Shillong, K’lyngkot 16
Ka Special Committee jong ka HSPDP Mawkynrew Circle ha ka Sngi Palei ka la rai ban ym sei kyrtong shuh hynrei kan ieh ha ka HSPDP Central Body la kan sei kyrtong ne em ha kane ka ilekshon MDC na Mawkynrew konstitwensi hadien ba u MDC uba mynta, Bah Martle N Mukhim u la pynbna ban ym ïakhun ïa ka ilekshon namar ka jingshitom ha ka met kaba wanrah ka jingbymbiang ka koit ka khiah ha ka met jong u.
Ïa kane ka Special Committee la thaw ban ïakren ïa kane ka mat katkum ka jingaibor jong ka General Meeting ka HSPDP Mawkynrew Circle kaba la long ha Maw-u-Sam ha ka Sngi Balang (15 tarik Kyllalyngkot 2025).
Haba pyntip ïa ka rai sha ki paidbah, u Assistant Secretary uba dei ruh u dkhot ka Special Committee, Bah K.S Suting u la ong ba ka Special Committee ha ka jingïalang kaba la pynïaid da u MDC ha ïing jong u ha Nongthymmai, ka la shim ïa ka rai ban ym sei kyrtong shuh namar ka jinglyngkot eh jong ka por, bad la iehnoh ïa kane ka mat ha ka HSPDP Central Body la kan sei ne kan ym sei kyrtong na Mawkynrew konstitwensi.
Kumta, u Bah Suting u la ong kino-kino kiba kwah ban pan tiket ban ïakhun ïa ka ilekshon ki dei ban leit beit sha ka HSPDP Central Body ban buh kyrteng khnang ba kan lah ban leh ïa kaba donkam.
Kum ban pynkynmaw, u Bah Martle u la dep pynbna ban ym ïakhun ïa ka ilekshon MDC ha kane ka sien kaba mynta namar ka jingshitom kaba ban ïa u ha kine ki khyndiat bnai.
