New Delhi, Jymmang 04
Ha kawei ka jingkhynra kaba heh, ki pulit ka Delhi ki la kem ïa u snar ba hakhmat eh jong kawei kynhun ba donkti ha ki kam khaïi briew, 6 ngut ki nong Bangladesh bad 5 ngut ki mynnong ka India halor ka jingkynnoh leh thok ïa ki kot ki sla kiba pynithuh nong India bad pynbiang jaka sah bad kam sha ki nongwan rung be-aiñ, la ïathuh ki pulit ha ka Sngi Saitjaiñ.
Hadien ka jingïoh jingtip na ki tnad syntiat, ki pulit ki la lap ïa ki jingïadei na Delhi sha Chennai, kaba la ïalam sha ka jingshah kem sa kumba 33 ngut ki nong Bangladesh ha Tamil Nadu, la bynrap uwei u ophisar pulit.
Ki jingkhynra ki la ïalam ruh sha ka jingkurup ïa 11 tylli ki ‘Aadhaar Card’ ba thok, ki syrnot thok, ki ID na Bangladesh, ki ‘Scanner’, ki tiar kor kompiwtor, bad ka pisa kaba T.20,000.
Katkum ka jingïathuh u DCP (Southeast), u R.K. Singh, kane ka jingtohkit ka la sdang naduh u bnai Lber, 2025 hadien ba la kem ïa u Aslam uba la tip ruh kum u Masoom na Taimoor Nagar, Delhi.
Une u la jam sha shiliang ka India lyngba ka Meghalaya bad u don ïa ki kot ki sla jong ka ri Bangladesh lem bad ki kot ki sla (kiba thok) ka ri India.
“Ki jingtohkit kiba kham bniah ki la ïalam sha ka jingshah kem jong u nongïalam ka kynhun runar, u Chand Miya, uba la don bynta ha ka kam khaïi briew na shiliang-sha-shiliang khappud India bad Bangladesh la palat shiphew snem, da kaba shim ruh T.20,000-25,000 na bynta shi khlieh briew,” u la ong.
Wat la um nang thoh nang tar, hynrei u la pynïaid ïa ka kynhun ba ïadei bad ki kam khaïi tuh – kaba bniah ha ka liang ki lad pynïasoh.
“Ki san ngut mynnong ka India, kiba pynïaid ïa ki ‘Cyber Café’, ki la ïarap ïa ki nongwan buhai shnong ban ïoh ‘Aadhaar Card’ bad ban shong ban sah ha ki nongbah kum ka Delhi bad Chennai”, la ong u DCP.
