Shillong, Jymmang 04
U Myntri Rangbah ka Jylla, Conrad K. Sangma ha ka Sngi Saitjaiñ u la ong ba ka Sorkar ka dang ïaid shakhmat ban pyni-thuh ïa 50 tylli ki skul ha kylleng ka Jylla ban mang ïa ka ‘Building Grant’ na bynta ban shna shuh ïa ki kamra klas kum shi bynta ban wanrah ïa ki skul Higher Secondary.
U la ong ba ïa kane ka skhim yn wanrah sha ki shlem pule Sorkar bad shimet ha ki jaka ba la jied, katkum ka jingdonkam, na bynta ban wanrah ïa ki kyrdan pule ‘Higher Secondary’.
U la bynrap ba ki skul kin hap ban pyndep ïa katto-katne ki kyndon ba la buh da ka tnad pule-puthi, kata, ka jingpynrung kyrteng ïa ki khynnah pule, ka jingdon jong kiba ‘pass’ na ki snem ba la dep, bad kiwei-kiwei.
“Ki skul ha ki jaka ba la jied kiba biang ïa ki jingdonkam ba la buh da ka Sorkar kin ïoh bynta ïa ka skhim na bynta ka ‘Building Grant’ kaba tang shisien,” u la ong, haba pynpaw ba la ïaid shakhmat bad kane ka sienjam ban pynthikna ba ki khynnah pule kiba ‘pass’ na ka eksamin matrik kin ïoh lad ban pule ha ki jaka pule ba shalor.
U Sangma u la kren ïa kane ha ka por ba plie ïa ki kamra klas bathymmai jong ka Bidanchi Higher Secondary School, Tura. Ïa ki saw tylli ki kamra klas bathymmai la shna lyngba ka jingïarap na ka Chief Minister’s Special Development Fund (CMSDF) bad la pynbna ruh ban ai shuh sa T.10 lak sha ka skul na bynta ban wanrah ïa ka kyrdan pule ‘Higher Secondary’ naduh kane ka samoi-pule ba mynta.
Haba ai khublei ïa ka tnad pule-puthi kaba la shim ïa katto-katne ki lad jingïarap ban kyrshan bad ïalam ïa ki khynnah skul ha ka ban pynkhreh ïa ka eksamin klas X, kynthup ïa ki kot jingïarap ‘CM-IMPACT’, u la ong, “Jan kumba 60,000 ngut ki khynnah skul ki ïakhun ïa ka eksamin SSLC man u snem, bad ka jingdon kiba ‘pass’ ka long kumba 25% khamtam na ki jaka nongkyndong. Ngim shym la lah ban pynroi ïa ki jingangnud jong ki khynnah jong ngi, bad ka risol mynta u snem ka long kaba sngewhun shibun namarba bun na ki khynnah jong ngi ki la ‘pass’ ïa ka eksamin. Ki don pat kito kiba don ïa ki jingsngew bapher-bapher halor kane, hynrei kum ka Sorkar bad shimet, nga sngewkmen haduh katta-katta ban ïohi ba ki khun jong ngi ki la ‘pass’ ïa ka eksamin bad kin sa jam pat sha ki jingpule kiba kham shalor .”
U la pyntip ba ka ‘Grant’ kan long haduh T.50 lak kum ka ‘Grant’ kaba tang shisien na bynta ban tei ïa ka ïingskul.
Haba kren halor ka jingnoh synñiang jong ka skul ha Tura, u la ai ka jingïaroh ïa ki bor pynïaid kiba la ïai bteng ban shakri ïa ka imlang-sahlang wat hapdeng ki jingtynjuh ha kine kiba bun ki snem. U la plie paidbah ruh ïa ka “Active Learning Centre” kaba la shna thymmai ha skul Bidanchi.
Da kaba ñiew ïa ka jingbei tyngka ha ki samla kum ka jingbei tyngka ïa ka lawei, u la ong, “Ki samla ka ri jong ngi ki dei ka bor kaba khraw tam, ka lad jong ngi, bad ka jingtynjuh jong ngi. Kano-kano ka jingpynlut ha ka jingpule jong ki ka dei ka jingbei tyngka ïa ka lawei jong ka Jylla bad ka ri. Ka jingkiew jong ka India kum ka ri ba khlaiñ bor ha ka pyrthei kan shong ha ka rukom pynheh-pynsan ïa ka pateng ban wan jong ngi.”
U la pynpaw ruh ïa ka jingangnud jong ka Sorkar ban pynbha ïa ki lad jingïarap ha ka pule-puthi ha ki kyrdan ba sha trai kumjuh ban pyntikna ba man la uwei-pa-uwei u khynnah-khlem da kheiñ ïa ka jinglong-jingman ka jaka-un ïoh ïa ka jingpule kaba paka bad kaba kynthup lang ïa baroh.
“Ka thong jong ngi kam dei tang ban tei ïa ki jingtei, hynrei ban tei ïa ki lawei”, u la ong.
