Jowai, Jymmang 04
Ki nongshong shnong jong ki shnong Pnar hapoh u pud u sam jong ka Block-I, ki la pynskhem biang ïa ka rai ban ym pdiang ïa kino-kino ki kam pynroi ne ki skhim bapher bapher na ka Assam bad ruh ban ym pdiang ïa ki EPIC, ki Aadhaar bad kiwei de na ka Assam.
Ïa katei ka rai kaba la shim nyngkong eh ha ka 21 Nailar, 2020, la pynskhem biang ha ka jingïalang paidbah ba la khot pynlong da ka Hynñiewtrep Border Dispute Redressal Forum (HBDRF) halor ar tylli ki mat jingdawa kata ka roi ka par bad ka jingim laitluid ha ki khappud bad ka jingpynphai noh ïa ka Block-I & II na Assam sha Meghalaya.
Ïa kane ka jingïalang la pynlong ha District Auditorium, Jowai ha ka 3 tarik Jymmang.
U Acting Dolloi jong ka Elaka Labang Nongphyllut u Ma P Samayang ha ka jingkren u la pynpaw ka jingbynñiaw halor ka jingsahdien bad ka jingshah ieh khunswet ka thaiñ Block-I namar haduh mynta ym don surok kali ym don skul ne ym don ki jaka ai jingsumar bad ki umbam umdih.
Kumjuh, na ka liang ki nongïalam jong ki seng kaba kynthup ïa ka JYF, HNYF nalor kiwei ki kular ban ai ka kti kamon kadiang ha ka jingïaleh ban wanrah biang ïa ki shnong Pnar na Block -I sha Meghalaya na Assam.
Na ka liang jong ar ngut ki nonghikai NEHU kiba la shongthait kata u Dr Henry Lamin bad u Prof P. Passah ki la ban halor ka jingdonkam ïa ka rukom pyrkhat pyrdaiñ kaba thymmai kumno ban ïaleh ban pynphai biang ïa ki shnong hapoh Block-I sha Meghalaya na Assam bad ka jingpynkhreh ïa ka dorkhas (memorandum) kaba biang nadong shadong ban ai sha ka Sorkar Kmie.
U Ma Erwin K Syiem Sutnga u la kam ba ki shnong ki thaw hapoh Block -I, ki dei mynshwa hapoh u pud u sam jong u Syiem Sutnga hynrei la shah knieh jubor ha ka por ba synshar ki phareng bad kumta na ka liang jong ka Kur Syiem Sutnga kin sa phah da ka ‘Pleader Notice’ sha ki bor pynïaid ka Karbi ban dawa ba kim dei ban mushlia shuh ha ki shnong ki thaw ha Block-I.
U Chairman jong ka HBDRF u Ma Chandame Sungoh u la kyntu ïa ki nongshong shnong jong ki shnong Pnar na Block-I ba ki dei ban wan ‘register’ noh ïa ki jaka jong ki sha JHADC khnang ban pynskhem ïa ka jinglong trai jong ki.
Kiwei kiwei ki rai ba la shim ha kane ka jingïalang ka long ban thoh noh sha ka Sorkar India ban pynïoh ïa ka hok longbriew-manbriew bad ki jaka-puta, ban pynkhlaiñ ïa ka jingdawa na ka bynta kane ka kam da ka lynti kaba jai-jai bad ban kyrshan ïa ka Sorkar halor ka mat jong ka jingïapynbeit pud.
Hashwa kane, la pynlong ïa ka jingïaid paidbah kaba la ïashim bynta da ki spah ngut ki nongshong shnong na ki shnong kiba hap ha ka thaiñ Block-I. Katei ka jingïaid paidbah ka la sdang na ka Lad College, Jowai bad ïaid lyngba ka surok bah Ladthadlaboh, New Hill, Iawmusniang bad pynkut ha District Auditorium Jowai.
Ki nongshong shnong na Block-I, ki la pyrta shitrhem ‘Justice and Development in border areas’ bad ‘re- transfer Block -I & II’ naduh ba sdang ka jingïaid paidbah bad haduh ba kut ka jingïaid paidbah.
Khnang ban kiar na kino-kino ki huri-hura ki pulit jong ka West Jaiñtia Hills District ki la synran lang ïa ki bad ki pulit pynïaid kali ruh ki la pynïaid ryntih ïa ki kali.
