Nongpoh, Jymmang 04
Ki nongïalam jong ka Dorbar Raid Nongpoh hadien ka jingïoh ujor na kiba bun ki paidbah nongshong shnong halor ka jingshah pynjot dusmon ka khlaw jong ka Raid kaba don ha Nongpoh, ha ka sngi Saitjaiñ kila mih sha-khmat ban khang pyrshah ïa ka kam rep kam riang bad ka jingpynjot pathar ïa katei ka khlaw jong ka Raid.
Haba kren sha ki lad pathai khubor, u Bah Linus Lyngdoh, Lyngdoh jong ka Raid Nongpoh ha ka jingdon ryngkat kiwei de ki longsan mansan, da ka mynsiem jong ka jingsngewkhia u la ong ba ka jingrep jingriang, ka jingpom pathar ïa ki dieng ki siej bad ka jingthang dusmon ïa katei ka khlaw jong ka Raid ka la pynlong ïa ka khlaw ban tyrkhong kaba la buh jingma ïa ki mrad ki mreng bad khamtam eh ka jingduh jong ki tyllong umbam umdih.
U Bah Linus Lyngdoh u la ïathuh ba ka Dorbar Raid kaba pynlong kyrkieh ha kine ki khyndiat sngi ba la dep halor kane ka bynta kala shim ïa ki rai ba naduh mynta u snem 2025, yn nym shah shuh ïa baroh ki nongrep ba kin thung ïa u Kwai, Synsar bad u Siej kumba la dep ban khang ha ki por kiba la dep.
U la ïathuh ba nangne shakhmat ka Raid kan nyn ithuh shuh ïa ki nongrep ki bym don ïa jingthoh na ka Raid bad baroh ki paidbah nongrep kiba la dep ban rep ban riang hapoh ka khlaw jong ka Raid, ba ki dei ban don ïa ki jingthoh kiba la ai da ka Raid ryngkat bad ka jingthew ïa ka jingheh jong ka jaka kaba ki rep khnang ba kan nym mih ka jingkyntur ne ïaknieh pud hadien habud bad ruh ba lada donkam ban pynthymmai ïa ki kot ki sla, ki nongrep ki lah ban wan mih sha ophis treikam ka Dorbar Raid ha Nongpoh.
U Bah Linus u la pyntip ruh ba ka Dorbar Raid kala rai ban khang pyrshah shisyndon ïa ka jingïadie ïathied jaka hapoh ka khlaw Raid kaba la tip ruh kum kata ka die Syrlei bad la khang ruh ban ai pateng ne aiwai sha kiwei pat ïa ki lum bad ki lyngkha rep ban pynlong kum ka kam khaïi (business) ïa ka khlaw Raid.
U la pyntip ruh ba ka Dorbar ka mana tyngeh ïa ki briew kiba ju mlien ban pynjot dusmon ïa ka mariang da kaba pom dieng pathar bad thang dusmon ïa ka khlaw jong ka Raid bad lada lap ïa kiba leh pyrshah ïa kine ki hukum kiba ka Dorbar Raid ka dep ban rai, ka Raid kan sa shim ïa ki sienjam kiba tyngeh ban pynshitom ïa ki.
Shuh shuh, u Bah Linus Lyngdoh u la pynpaw ruh ba ha ka Ri Raid, ki paidbah ki lah ban rep ban riang lyngba ka jingtip jong ka Dorbar Raid, hynrei kin nym lah pat ban kam trai ïa ka jaka bad ba kum ki nongïalam Raid kiba don ïa ka jingkitkhlieh na ka bynta ka pateng ka ban sa wan, kim kwah satia ba kane ka jingrep hapoh kane ka khlaw Raid kan ktah pat ïa ka mei mariang sawdong sawkun bad kyntu ïa baroh ki paidbah nongrep ba kin bud ryntih kine ki hukum kiba la pynmih bad ai ïa ka jingïatreilang ryngkat bad ka Raid na ka bynta ka jingbha bad jingmyntoi lang jong baroh.
