Jowai, Jymmang 04
Ha ka sienjam ba khraw ha ka histori jong ka India Post, ka la pyllait paidbah ïa ka Permanent Pictorial Cancellation (PPC) bad ka Special Cover ban pynsahnam ïa u khlawait ka Rilum Jaiñtia u Kiang Nangbah.
U MLA ka Jowai, Ma Wailadmiki Shylla kum kongsan, u la pyllait ïa kine ki dak sah kynmaw bad ki cover ha ka jingïalang kaba long ha ka 3 tarik u Jymmang ha Kiang Nangbah Government College, Jowai.
La ïadonlang u CEM ka JHADC Ma Thombor Shiwat, u Director of Postal Services (HQ) North East Circle u KVLN Murty, u President ka Seinraij Jowai bad Principal ka Kiang Nangbah Govt. College u Ma H Toi, u Dolloi ka Elaka Jowai ma Puramon Kynjing bad kiwei kiwei.
U Murty u la ong ba kane ka dei ka sien nyngkong ba la pynmih ïa ka ‘Permanent Pictorial Cancellation’ ha Meghalaya bad ba ka jingthmu ka long ban pynbna bad pynpaw ha kylleng ka ri bad shabar ban pynsahnam ïa u Kiang Nangbah. U la kyntu ruh ïa ki samla ban shim kabu na ki jingshakri jong ka Post Office, ym tang ha ka ban phah tiar ne ki shithi hynrei ban kynshew pisa hapoh ka ïing dak.
Ka Special Cover, kaba dei ka envelope kaba don ka dur bad ka jingïathuh khana lyngkot shaphang u Kiang Nangbah, kaba lah ban ïoh na Shillong GPO ha ka dor T.20 katba dang don ha ka stock. Katba ka Permanent Pictorial Cancellation, kaba don ka shap kaba pyni ïa ka dur u mot sahnam u Kiang Nangbah ha Syntu Ksiar, ka ban neh bad treikam haduh 5-10 snem ban wan.
U Ma Wailadmiki Shylla u la ai khublei kyrpang ïa ka tnat India Post halor ka jingithuh ïa u nongïaleh laitluid ka Rilum Jaiñtia lyngba kane ka sienjam. Wat la ka jingïalang ka long kaba rit, hynrei u la ong ba ka dei kaba don jingmut.
U la kyntu ruh ban tei noh ïa u mot sahnam jong u Kiang Nangbah ha kane ka kolej bad u la kular ban ai jingkyrshan pisa ban tei ïa u mot.
“Ka dei ka sngi ban kynmaw ïa ka tynrai ka jong ngi,” la ong u H Toi, haba pynkynmaw ïa ka jingshlur jong u Kiang Nangbah bad ka jingdonkam ban burom ïa kiba la ïaleh na bynta ka jinglaitluid ka ri.
