Shillong, K’lyngkot 21
Ki jinglap kiba thymmai haba ïadei bad ka jingshah thombor jong u tyngshop Saif Ali Khan ki la pynpaw ba u nongthombor jong u, u Shariful Islam Shehzad Mohammad Rohilla Amin Fakir uba dei u nong Bangladesh u la jam lyngba sha shiliang ka Wah Dawki ha Meghalaya ban rung sha India kumba hynñiew bnai mynshuwa bad pyndonkam ïa ka ‘Aadhaar Card’ jong u nongshong shnong ka West Bengal ban thied ïa ka ‘SIM Card’, la ïathuh ka khubor ‘The Indian Express’, da kaba pynshong nongrim halor ka jingtohkit ki pulit Mumbai.
Ïa une uba shah kynnoh ba 30 snem ka rta, la kem na Thane, Maharashtra ha ka por step jong ka Sngi U Blei. Ka jingshah kem jong u ka long lai sngi hadien ba u la rung tuh ha ïingsah jong u Saif Ali Khan, ha Bandra, da ka jingthmu ban lute bad dung ïa utei u tyngshop haduh hynriew sien, katba u dang ïakhru bad u.
Ki pulit ka Mumbai ki la pynpaw ba une uba shah kynnoh u la pynkylla kyrteng sha u Bijoy Das hadien ba u la rung be-aiñ sha India. Ka jingtohkit kaba kham bniah haba ïadei bad utei uba shah kynnoh ka la pynlong ïa ki pulit ban wad ïa ka jingïaid lynti jong u – kaba la ïalam sha ka jingshah thombor jong u Saif Ali Khan.
Ka jingtohkit kaba ha shwa ka la lap ba katei ka ‘SIM Card’ kaba u Fakir u pyndonkam ka dei kaba la ‘register’ ha ka kyrteng Khukumoni Jahangir Sekh na West Bengal. Da kaba pynshong nongrim na ki tyllong khubor na ki pulit, ka ‘The Indian Express’ ka la ïathuh ba la suba ba u Fakir u la pyndonkam ïa ka ‘Aadhaar Card’ jong u Sekh ban ïoh ïa katei ka ‘SIM Card’.
Ha kajuh ka por, la ïathuh ba u la ïaid kylleng-kylleng ha West Bengal na bynta katto-katne taïew bad u la pyrshang ruh wat ban shna ïa ka ‘Aadhaar Card’ na ka bynta lade hynrei um shym la lah satia.
U Fakir u la ïathuh ha ki pulit ba u la pule haduh klas XII ha Bangladesh bad u la wan sha India ban wad kam, ong ka khubor ‘The Indian Express’. U la kam ba u la jam lyngba ïa ka Wah Dawki, kaba don ha khappud India-Bangladesh ha Meghalaya, ban rung sha India. Hangne, la kynnoh ba u la leit da ka jingithuh thok jong u Bijoy Das.
Hadien ba u la sah katto-katne taïew ha Bengal, u la wan sha Mumbai ban wad kam. U Fakir u la jied khnang ïa ki jaka ha kaba u lah ban trei khlem da donkam ban aiti ïa ki kot ki sla.
Ka khubor ka ïathuh ba uwei u nongtrei bylla uba kyrteng u Amit Pandey, u la ïarap ïa u Fakir ban pynïoh ïa ki kam pynkhuid ïing ha ki ‘Pub’ bad ki ‘Hotel’ ha ki thaiñ Thane bad Worli.
Ha kaba sdang, u Fakir u la ïathuh ha ki pulit ba u dei u nongshong shnong ka Kolkata. Hynrei haba peit bniah ïa ki ‘call record’ jong u, ki ophisar ki la lap ïa ki katto-katne ki jingïa ‘phone’ kiba mih shabar sha ki nombar kiba don ha Bangladesh. U Fakir u la pyndonkam ruh da ki ‘mobile app’ ban ‘phone’ sha ki bahaïing ha Bangladesh, ki la ïathuh.
Nangta ki pulit ki la phah ïa une uba shah kynnoh ban ‘phone’ ïa uwei na ki bahaïing jong u. “U la ‘phone’ ïa la u hynmen bad u la ong ïa u ban phah ïa ka syrnot iehnoh skul jong u. U hynmen u la phah ïa ka (ka syrnot) ha ka ‘mobile phone’ jong u Fakir. Kane ka kot ka long ka sakhi kaba skhem ban pynshisha ba u dei u nong Bangladesh,” la bynrap shuh shuh ki ophisar.
Ha shwa ban rung sha ka ïing-paki Satguru Sharan, kaba don ïa ka ïingsah jong u Saif Ali Khan ha ka mala kaba 12, utei uba shah kynnoh, u la pyrshang ban rung tuh ha ka ïing kaba don hajan jong uwei pat u khlur Bollywood, la bynrap shuh-shuh ka khubor. Hynrei hangta um shym la ïoh lad namar ki ksew ki la sdang ban wiar ïa u.
Uwei u heh pulit ha ka Lah Sngi U Blei u la ïathuh ba la kynnoh ba u Fakir u la rieh ha kper jong ka ïing-paki Satguru Sharan haduh ar kynta hadien ba u la dep dung ïa u Saif Ali Khan hapoh ïingsah jong u ha ka por ba u leit rung tuh.
Hadien ka jingwad kaba lai sngi, ki pulit khatduh ki la ïoh ban kem ïa u na Thane hadien ba ki la lap ksai ïa u da ka jingïarap u nongtrei bylla (uba u la kynjoh) bad lyngba ka UPI kaba u la pyndonkam na bynta ban thied bam.
