Shillong, K’lyngkot 21
U Symbud Myntri Rang-bah ka Jylla, Bah Prestone Tynsong ha ka Sngi Ba-ar u la ong ba ka dei ban don teng ka por ban ai jingïaroh ïa ka Sorkar ban ym ban lapmiet tang ha ka ban kdew kti ïa ka.
Haba kren ha ka jingïalang buh mawnongrim na bynta ka ïing-paki bathymmai jong ka Secretariat bad kiwei-kiwei ha Umsawli, New Shillong, u Bah Tynsong u la ong ba kane ka dei ka khyllipmat ban kmen, ban sngewbha bad ban ai ka jingïaroh ïa u Myntri Rangbah ka Jylla, u Conrad K. Sangma bad ïa ka Sorkar baroh kawei.
“Balei nga ong kumta, teng-teng lapmiet tang ban ïa kdew kti ïa ka Sorkar. Nga kyrpad ba dei ban don teng ka por ba ngin ai jingïaroh ïa ki kam kiba ka Sorkar ka leh namar nga tikna ba 75% ki nongshong shnong ha ka Jylla kim ju poi pyrkhat ba mynta ka sngi kan dei ka sngi kaba ngi lah ban buh ïa u mawnongrim na bynta ka Secretariat ka bathymmai,” ong u Symbud Myntri Rangbah.
Haba ïadei bad ki jingmyntoi halor kane ka sienjam, u la ong ba ka banyngkong eh kaba u kwah ban pynsngew khamtam sha ki paidbah nongshong shnong, ka Synjuk ki Rangbah Shnong jong ka thaiñ, ka long ba dei ma ki, ki ban ïoh nyngkong ïa ka jingmyntoi.
“Kane ka thaiñ jong phi kan long kawei na ki jaka kaba itynnad haduh katta-katta ba kylleng sawdong ka India bad pyrthei hadien ba ngi la dep ïa ki projek bapher-bapher, kin sa wan jngoh kai, kin sa wan donkam bad kin sa wan ban ïatrei kam lang bad ka Sorkar kumjuh bad phi ki bor shnong…to ngin ïatreilang bad ka Sorkar,” u la ong
Haba kdew ba kane ka projek kaba palat 1 hajar 100 klur kam dei ka kam kai hynrei ka jingmyntoi kaba khraw, u Symbud Myntri Rangbah u la kyrpad ïa ki nongsynshar shnong ban ïatreilang bad ka Sorkar khnang ban ym mih kino-kino ki jingthut haba ïadei bad ka jingïaid shakhmat jong ka kam.
“Nga da kyrpad rit ïa ki Rangbah Shnong jong kane ka thaiñ, ïatreilang bad ngi. Ka thong jong kane ka projek ka long ban pyndep ha lane shuwa 3 snem nangne shakhmat. Kumta to ngin ïatreilang namar kane kam dei ka burom jong u Conrad ne ki Myntri Sorkar, kane ka dei ka burom jong ki paidbah ka Jylla baroh kawei,” u la ong.
Shuh shuh haba kren halor ka ‘Vision & Mission Document’, u Bah Tynsong u la bynrap ba ka Sorkar ka kwah ban ïaid shakhmat bad ki kam ha baroh ki tnad treikam ka Jylla ba hapoh u 2032, baroh kine ki jingangnud kin urlong na bynta ka Jylla.
“U mawnongrim mynta ka sngi u long ban ainam ïa ki paidbah ka Jylla bad shen ka Secretariat thymmai kan sa ïeng bad ka jingkyrkhu ka leit sha ka Jylla,” u la ong.
