Jowai, K’lyngkot 21
Kumba ju long ha ki ilekshon ba la dep, ki dorbar shnong bapher-bapher ki ju wan shakhmat ban pynpaw ka jingkyrshan ïa la ki kyrtong. Ha kane ka kynti ruh ka Dorbar Shnong Lumshnong ka la pynpaw ban ai ka jingkyrshan kaba pura ïa u Ma Grimlang Dkhar ha ka ilekshon MDC sha JHADC ban ïeng na ka Congress na ka 28-Narpuh Konstitwensi.
Ïa kane ka rai ka Dorbar Shnong Lumshnong ka la shim ha ka jingïalang kyrpang kaba la long ha ka 20 tarik Kyllalyngkot ha Community Hall Lumshnong.
Ïa ka jingïalang la pynïaid da u Waheh Shnong Ma Monlang Ladong ha ka jingdonlang u Assistant Waheh Shnong Ma Change Rymbai, Assistant Secretary Shnong Ma Deibor Dkhar ryngkat ki nongshong shnong kynthup naduh ki longkmie longkpa, ki samla shynrang bad kynthei jong ka shnong.
Ha ka kyrwoh ba la phah da u General Secretary shnong Lumshnong Ma Embhalang Lamare, u la ong ba ka Dorbar da kawei ka sur la shim ïa ka rai ban ai ka jingkyrshan kaba pura ïa u Ma Grimlang Dkhar kum u kyrtong MDC na ka shnong Lumshnong.
Ka Dorbar Shnong ka la Kitbok-kitrwiang ïa u Ma Grimlang Dkhar ba un ïoh ka met kaba koit ba khiah khnang ba un lah ban ïaid lynti bad ban ïoh ïa ka jingjop donburom lyngba ka jingkyrshan jong ki paidbah.
