Shillong, K’lyngkot 22
U Myntri uba peit ïa ka tnat Rel u kwah ban ïashem sa shisien ïa ki kynhun ki bym pdiang ïa ka lynti rel ha shwa ban pynkut noh ïa kane ka projek ha Rilum Khasi.
Haba ïakren bad ki nongthoh khubor ha ka Sngi Balang, u Myntri Rangbah, Conrad K Sangma u la ong ba ha ka jingïakynduh jong u dang shen bad u Myntri ka tnat Rel ha Delhi u la pynpaw ka jingsngewkhia halor ka jingbym ïaid shakhmat ka projek lynti rel kaba dei ban poi sha Byrnihat bad Shillong.
Hynrei u Myntri Rangbah u la kren shai ba kane ka projek kan ïaid shakhmat tang lada kiwei pat ki kynhun ki mynjur lang.
U Conrad u la ong ba u Myntri ka tnat rel u la ong ba un sa phah shithi sha ka Sorkar Jylla ban pynsngew ba lada ym lah ban pynïaid shakhmat ïa ka projek lynti rel kaba la sahteng naduh u snem 2017, ka Sorkar Pdeng ka hap ban shim ïa ka rai ban pynkut noh ïa kane ka projek. Hynrei ha kajuh ka por, na ka liang u Myntri u dang kwah ban ïashem bad ki kynhun kiba pyrshah lynti rel ban pynsngew ha ki bad sngewthuh ïa ka jingkwah jong ki.
Kumta u Myntri ka tnat Rel un sa phah shen ïa ka shithi sha ka Sorkar Jylla ha kaba ïadei bad kane ka mat ha kine ki khyndiat bnai.
Kum ban pynkynmaw, ka projek lynti rel kaba dei ban poi haduh Ronghana, Byrnihat ka dang sahteng namar ki don ki kynhun kiba pyrshah bad haduh mynta ka projek ka dang sahteng khlem pat lah ban pynïaid shaphrang.
