Shillong, K’lyngkot 22 (UNI)
Ka tnad shipai khappud ïada ri, ka Border Security Force (BSF) bad ka Border Guard Bangladesh (BGB) ha ka Sngi Balang ki la pynlong ïa ka jingïalang ‘Border-Coordination’ ha ka kyrdan jong ka Sector Commandment ha khappud Gumaghat ha South West Khasi Hills District ban ïakren halor ki mat ba kongsan ba ïadei bad ki kam khappud kiba don jingmyntoi lang.
“Ka jingïalang ka thmu ban pynkhlaiñ ïa ka jingïadei hapdeng ki ar ri, ban pyntikna ïa ka jingïatreilang kaba kham bha bad ban shimkhia ïa ki jingeh bapher-bapher kiba ïadei bad u pud u sam,” la ong ka kyrwoh ba la pynmih da ka BSF-Meghalaya Frontier.
Ïa ka kynhun BSF la ïalam da u Deputy Inspector General ka Sector HQ BSF Shillong, u Manoj Kumar Barnwal, katba u Md. Saiful Islam Chowdhury, Deputy Director General, Sector Commander BGB, Sylhet, Bangladesh u la lamkhmat ïa ka kynhun jong ka BGB.
Ha kane ka jingïalang, ki heh ophisar jong baroh ar tylli ki tnad shipai ïada khappud ki la ïakren halor ki kam bapher-bapher kiba ïadei bad u pud u sam kum ka ‘Co-ordinated Border Management Plan’ lem bad kiwei-kiwei ki mat kiba don lang ïa kajuh ka jingmut.
Ha kaba kut jong ka jingïalang, baroh arliang mamla ki la pynpaw ïa ka jingsngewhun naba ka jingïakren ka long kaba don jingmut bad kaba sngewtynnad, ha kawei ka liang, kaba pyni ïa ka jingïadei paralok hapdeng kine ki ar ri, ong ka kyrwoh.
“Baroh ar ngut ki heh ophisar ki la ban biang halor ka kular jong ki ban pynroi ïa ka jinglong-jingman kaba shngaiñ bad suk-saiñ ha khappud bad ïaroh ïa ki jingpyrshang kiba dang ïaid shakhmat haba ïadei bad la ki kynhun shipai ha ka ban pynneh-pynsah ïa ka jingsuk ha ka thaiñ,” ong ka kyrwoh.
Shuh shuh ka jingïalang ka la kut ha ryngkat ka jingmut kaba bha, ha kaba baroh arliang ki la mynjur ban pynlong ïa ki jingïalang khmih bniah halor ka jingtreikam ha ki por ban wan kum shi bynta ban pyntikna ïa ka jingbteng jong ka jingïatreilang bad ka jingtreikam kaba ïaid beit ïaid ryntih jong ki kam ki jam ha khappud,” ong ka kyrwoh na ka BSF.
