Shillong, K’lyngkot 22
Ka jingpynlut ka Sorkar na ka bynta ban kyntiew ïa ka pule-puthi ha kane ka jylla khamtam ka jingbei pisa ban siew tulop ïa ki nonghikai jong ki skul bad kolej shimet ka la kham bun shisha haba ïanujor bad ka jingpynlut na ka bynta ki skul ne kolej kiba peit da ka Sorkar.
Katkum ka jingwad bniah kaba la lap ha kaba ïadei bad ka rukom bei pisa ka Sorkar ïa ki skul naduh ki skul shimet bad skul Sorkar, la lap ba ka Sorkar Jylla ka la pynlut kham bun ka jingkyrshan ïa ki skul shimet.
Na ka bynta ki skul shimet kiba ju ïoh ïa ka Grant-in-aid na ka Sorkar ka kot sha ka T.917 klur katba ïa ki skul sorkar ka jinglut ka long T.684 klur. Tang na ka bynta ki nonghikai skul SSA ha Meghalaya, ka sorkar pynlut haduh T. 366 klur.
Haba kheiñlang ka jingpynlut ka la kot sha ka T.1,967 klur. Haba phai sha ki nonghikai ha ki kolej Sorkar bad kolej shimet, ka Sorkar ruh ka la bei pisa bha khamtam ban siew tulop.
Ka jingpynlut na ka bynta ban siew tulop ïa ki nonghikai ha ki kolej Sorkar ka long T. 37.08 klur katba ka jingpynlut na ka bynta ban siew tulop ïa ki nonghikai kolej shimet ka long T.179.6 klur.
Shuh shuh la lap ba ki don bun tylli ki skul bad ki kolej shimet kiba ïoh pisa na ka Sorkar ban siew tulop ïa ki nonghikai skul, katba ka bai skul bad ka bai kolej pat ki dang shim na ki samla pule ha ka jingsiew kaba heh man la u snem.
