Shillong, K’lyngkot 24
U Myntri ka tnat Pule-Dangle ha ka Jylla, Rakkam A Sangma u la pyntip ba ka Sorkar ka la rai ban buh sa ar tylli ki kolej ‘Degree College’ hapoh ka Jylla ha une u snem pule ba mynta.
Haba ïakren bad ki lad pathai khubor ha ka Sngi Thohdieng, u Rakkam u la ong ba ïa kane ka jingtyrwa la dep ban ai jingmynjur da ka Ministry of Education ka Sorkar Pdeng.
U la ïathuh ba kine ‘Degree College’ kawei ka ban buh ha East Jaiñtia Hills bad kawei pat ha West Khasi Hills District.
U Myntri u la pyntip ba ka tnat Pule-Dangle ka la dep pynbiang ïa ka jingpynbna paidbah ban thungkam ïa palat 100 ngut ki nonghikai ha kine ar tylli ki ‘Degree College’.
Haba kylli, u Rakkam u la ong ba ka Patharkhmah Degree College bad ka Rongjeng Degree College kin sa sdang noh ïa ka jingtreikam hapoh une u snem pule ba mynta, bad u la pyntip ruh ba ïa ka Science & Commerce College ha Mawphlang ruh ka Sorkar kan sdang noh ïa ki jingai jinghikai mynta u snem pule.
Ha kawei ka liang, u Rakkam u la pynpaw ba ka tnat ka la mad shibun bah ki jingtynjuh bad jingeh ha kine ki 40-50 snem ba la leit, namar ba ka Meghalaya ka dei ka Jylla kaba don bun eh ki skul, ki nonghikai haba ïanujor bad kiwei pat ki Jylla hapoh ka Ri.
“Ngi don bun jait ki nonghikai, hynrei ngi duna ha ka jingdon ki jingtei bad mynta hapoh ka jingïalam u Myntri Rangbah, ngi la sdang ïa ki jingpynkylla”, u la ong.
U Myntri u la ong ba ha kine ki san snem jong ka Sorkar MDA hapoh ka jingïalam u Conrad Sangma kum Myntri Rangbah, la shna ïa ki ïing bathymmai na ka bynta kolej, ki skul Secondary, skul Lower Primary, skul Lower Primary, kumjuh kiwei ki jaka pule kum ki Polytechnic, ka ITI bad kiwei-kiwei.
Ha kajuh ka por, u Rakkam u la pyntip ba ka tnat kan sa pynmih noh ïa ka jingpynbna na ka bynta ban thung kam ïa ki nonghikai Lower Primary ha ki skul Sorkar.
