Shillong, K’lyngkot 27
Ka ding kaba klang ka la bam duh ïa kawei ka ïing ha Jhalupara kaba la jia ha ka janmiet jong ka Lah Sngi U Blei ha ka por kumba 3.30 eiei.
Kane ka ïing ka dei ba la long trai da uwei u bar jylla ba la tip kyrteng kum u Sharda Pradhan.
Mar ïa ïoh jingtip halor kane ka jingjia, ki bor pynlip ding na Nongthymmai mar-mar ki la phah ïa ka kali pynlip ding sha katei ka jaka ban tem na ka jingpur ka ding sha ki ïing kiba don marjan. Nalor kata, la phah ruh ïa ki kali pynlip ding na Mawngap, Sanmer bad Mawlai ban ïarap tem ïa ka ding, bad ban tehlakam ïa ka jingpur sted ka ding.
Ha kane ka jingjia ym shym la don mano-mano ba mynsaw. Na ka liang ki pulit ki dang tohkit ïa ka daw jong ka jingpluh katei ka ding kaba ym pat shym la lah ban tip haduh mynta ïa ka tynrai jong ka jingkem ding.
