Nongpoh, K’lyngkot 27
Ka sor rit Byrnihat sa shisien pat ka la ïoh biang ïa ka nam kum ka jaka kaba don ïa ka lyer kaba jaboh tam ha baroh kawei ka ri. Kane ka jingïoh ïa katei ka nam, kumba la kynnoh da ki paidbah nongshong shnong ka dei halor ka jingdon jong ki karkhana pynmih tdem jaboh ha katei ka thaiñ kaba la ktah ïa ka koit ka khiah jong ki paidbah, ki jingthung jingtep, ka umbam umdih bad ki jingri jingdup kumjuh.
Kumba la sakhi lyngba ka kaiphod jong ka Central Pollution Control Board (CPCB), ka thaiñ Byrnihat ka dei ka sor rit kaba don ïa ka lyer kaba jaboh tam la ar snem kynthih, kata naduh u snem 2024 bad mynta u snem 2025 ruh kumjuh nalor ka jingdon jong ki phngit PM2.5 bad PM10 kiba lah ban ktah jur ïa ka koit ka khiah jong ki paidbah.
Kum ban shu kdew, dang ha ka 25 tarik mynta u bnai Kyllalyngkot, da ki spah ngut ki paidbah nongshong shnong ka thaiñ Byrnihat hapoh ka jingïalam jong u Bah Phrangsngi Syngkli, Lyngdoh Raid jong ka Raid Nongkylla ki la mih paidbah ban dawa ba ki bor ba dei khmih ka jylla ki dei ban bthah ïa ki karkhana kiba pynmih tdem jaboh ba ki dei ban buh da ki kor ki bor (filter) ban pynduna ïa ka jingmih lyer jaboh. U Bah Syngkli u la ïathuh ba kum ki paidbah katei ka thaiñ, ki mad jingeh shikatdei halor ka jingpynmih tdem jaboh ryngkat ki pum-pum jong kitei ki karkhana kat haduh ba la shem jingeh ban ring mynsiem bad ki jingthung jingtep, ki ïing ki sem, ki umbam umdih ki la shu ïong lut khait na ka jingher jong ki pum-pum kiba ïong kiba la pynmih na kitei ki karkhana bad bynrap ba wat ban thad jaiñ shabar ruh um long shuh namar ka jingher jong kitei ki pum-pum.
Kane ka jingleh khlem akor bad pynmih tdem jaboh jong kitei ki karkhana, ka la pynlong ruh ïa kiba bun ki nongshong shnong jong ka thaiñ ba kin ïoh ïa ki jingpang ba har rukom khamtam kum ka jingpang Cancer, TB bad Asthma kaba la kham kynrei bad bynrap ruh ba lada wat kiba la heh la san ruh ki shem jynjar ban ring mynsiem namar ka jingjaboh ba palat pud jong ka lyer, katno lei kan ktah ïa ki khynnah kiba dang rit dang lung.
Namar kata, ki paidbah nongshong shnong ka thaiñ ki la byrthen ruh ba lada ka Sorkar lane ka Meghalaya State Pollution Control Board (MSPCB) kim leh eiei ban pynduna ïa ka jingpynmih tdem jaboh jong kitei ki karkhana, kan sa poi ka por ba ki hap ban mih paidbah ban khang khyrdep hi noh ïa baroh kitei ki karkhana kiba pynmih tdem jaboh da kaba kyntu ruh ïa u MLA ka thaiñ, Bah Sosthenes Sohtun ba un shimkhia lem halor kane ka kam ïap kam im jong ki paidbah nongshong shnong.
