Shillong, K’lyngkot 27
Ka Regional Committee pynbeit pud ha Jaiñtia Hills kaba la khlieh da u Symbud Myntri Rangbah, Bah Sniawbhalang Dhar, ka la pan ïa ka kaiphot halor ka jingdon ki shnong hapoh ka thaiñ Block-I, West Jaiñtia Hills District.
“Ha ka jingïalang ba la long ha u Nohprah 2024, nga la ai por lai bnai ïa u Deputy Commissioner ban pynïoh shuh shuh ïa ki jingtip bad aiti ïa ka kaiphot haba ïadei bad ki shnong kiba don ha khappud, ka jingdon ki nongshong shnong bad ki jaidbynriew aïu” ong u Bah Dhar haba ïakren bad ki nongthoh khubor ha ka Lah Sngi U Blei.
U la ong ba u DC un sa wanrah sha ka Regional Committee ïa ka kaiphod ka ban sa aiti pat sha ka Sorkar, hadien kata ka Sorkar kan sa ïakren pat bad ka Assam hadien ba ki arliang mamla ki la mynjur ban ïakynduh.
U Bah Dhar u la pyntip ba ka Hynñiewtrep Achik National Movement (HANM) ka la ïakynduh bad kyrpad halor ka jingdonkam ban pynkloi noh ïa ka jingpynbeit ïa ki jaka ba ïakajia.
“Nga ïathuh ha phi ba ka Regional Committee ka Meghalaya bad Assam kin sa ïakynduh hadien ka ilekshon jong ki Autonomous District Council (ADC)”, u la ong.
Ka Meghalaya bad Assam kin sa sdang biang shen ïa ka jingïakren pynbeit pud jong ka wat ba ar ban pynbeit sa hynriew tylli ki jaka ba dang don hapdeng ka jingïakajia hapdeng ki ar jylla.
Kine hynriew tylli ki jaka ba dang sah ban pynbeit ki kynthup ïa ka Langpih, Borduar, Nongwah-Mawtamur, Deshdoomreah, Block-II bad ka Block-I, Psiar-Khanduli.
Shwa ïa kane na ka liang ka seng HANM ka la kyrpad ïa u Symbud Myntri Rangbah ban leh eiei halor ki jingeh ba ïakynduh da ki paidbah kiba sah ha ki jaka khappud namar ka jingbym ïoh ïa ki kam pynroi.
Na ka liang ki nongïalam ka HANM ki la pynsngew ruh sha ka Sorkar halor ka jingshah pyndik ki paidbah (Block-I) ha khappud ha ki suba lehnoh Karbi, bad halor kane na ka liang ka HANM ka la kyntu ïa ka Sorkar ban phah ïa ki pulit ban pahara ha khappud na ka bynta ka jingshngaiñ ki paidbah nongshong shnong.
“Ngi kyrpad ïa phi ban ïakren lem ïa kane ka kam bad ka Sorkar Assam kumjuh bad ka Sorkar India, lada donkam, ban pynthikna ba ki briew jong ngi kin ïoh ïa ka jingbishar ba hok bad ka jingisynei kaba ki dei ban ïoh”, la ong ki nongïalam ka HANM.
