Shillong, K’lyngkot 27
U Chairman barim jong ka Union Public Service Commission (UPSC), Prof. David R. Syiem-lieh u la ïoh pdiang ïa ka khusnam ‘Padma Shri’ 2025 na ka bynta ka jingnoh synñiang sha ka thoh ka tar ka pule-puthi.
U Prof. David u dei ruh u Vice-Chancellor barim ka Rajiv Gandhi University, Arunachal Pradesh.
Ka khusnam ‘Padma Shri’ ka dei kawei na ki khusnam ba hakhlieh duh jong ka ri, kaba la bynta ha ki lai tylli ki kyrdan, kata, ka ‘Padma Vibhushan’, ka Padma Bhushan’ bad ka ‘Padma Shri’.
Ïa kine ki khusnam la ai lyngba ki jingnoh synñiang ha ki jait jingpule/ki kam bapher-bapher, kata – ka kam shna dur, ki kam ha ka imlang-sahlang, ki kam paidbah, ‘science’, ‘engineering’, ka khaïi-pateng bad ka kam karkhana, ki kam ba ïadei bad ki dawai dashin, ka thoh ka tar bad ka pule-puthi, kam ïalehkai, ki kam Sorkar, bad kiwei-kiwei.
Kiba ïoh ïa ka ‘Padma Bhushan’ ki dei na ka bynta ka jingshakri ba kyrpang jong ka kyrdan ba hakhlieh duh bad ‘Padma Shri’ na ka bynta ka jingshakri ba kyrpang ha kano-kano ka kam. Ïa kine khusnam la pynbna ha ka sngi rakhe ïa ka ‘Republic Day’ man la u snem.
Ïa kane ka khusnam la ai da ka President ka Ri India, ka Droupadi Murmu. Ha u snem 2025, ka President ka la ai 139 tylli ki khusnam kaba kynthup 7 tylli ki ‘Padma Vibhushan’, 19 tylli ki ‘Padma Bhushan’ bad 113 tylli ki ‘Padma Shri’.
Na kine, 23 ngut ki dei ki kynthei bad 10 ngut ki bym dei ki nongshong shnong ka ri India kiba hap hapoh ka NRI / PIO / OCI bad 13 ngut ki dei ki khunswet.
