Babu Kular Khongjirem
Ha ka sien kaba nyngkong eh ba ngi ïohi ha ki kam hima-sima ha Jylla jong ngi ba ki seng saiñpyrthei (political party) kin ïatyngkhuh bad ki bor pynïaid shnong, pynïaid thaw, ki bor Raid ki bor Hima khamtam ha ka por ilekshon. Ki bor pynïaid shnong ruh ki don la ka bor synshar laitluid (autonomous body), kumba long ka District Council khamtam haba la wanrah ka Parliament ïa ka Amendment halor ki Panchayati Raj System.
Kane ka ilekshon MDC mynta u snem 2025 ka la ïatyngkhuh bad jia ryngkhat (co-incidence) hapdeng ka Final Exam ba la pynïaid da ka MBOSE ha ki kyrdan SSLC bad HSSLC Exams. Don ruh ki khynnah kiba la kham heh ka rta, ki la ïoh ruh ban don bynta ha ka jingthep vote wat hapdeng ka Exam jong ki ruh. Don ruh kiba pynleit jingmut shisha triang ha ka jingpule jong ki khnang ba kin poi kham shakhmat. Ki paidbah bad ki kmie ki kpa ki khmih lynti ba ka sorkar, ki seng saiñpyrthei, ki shnong ki thaw, ka imlang sahlang baroh kawei kin pyrkhat kyrpang ban ïarap lem, ban ai mynsiem lem, bad ban wad ki lad ki lynti kumno ban kham lah shuh shuh ban kyntiew ïa ka jingpass bha ki khynnah khamtam haba ngi ïohi ïa ka jinghiar arsut ka pule puthi ha ka jylla jong ngi nalor ka jinghiar ka percentage jong ka jingpass ki khynnah ha ki Public/External Exam ba la pynïaid (conducted) da ka MBOSE man la ka snem.
Kaba phylla pat, phewse, ka long ba ka seng kiba ki paidbah ki khmih lynti ba ka dei ka seng kaba don bun eh ki Nonghikai ba stad bad ba kham shemphang, ka seng kaba don bun ki Asst Lecturer, ki Professor, ki Faculties, bad kiwei kiwei kiba dei ruh ki nongsaiñdur ïa ka lawei jong ka pule puthi jong ki khynnah, kiba ngi khmih lynti ba kin long kiba pyrkhat lem ïa ka bit ka biang bad jingmyntoi ki khynnah, kin pyrkhat bad leh politic pynban ïa ka lawei ki khynnah tang na ka bynta ka jingïohnong politic jong ki. Imat, tang ban jop ilekshon, lada ‘failed’ lut ki khynnah ruh ym lei-lei. Ngi ïohi ruh, ba ki don ki shnong kiba kwah pynlong common platform ïoh ka ktah bad ktha jabieng ki khynnah ha kum kane ka por Exam, namar ka dei ka por (critical time) ban rai ïa ka ‘pass’ ka ‘fail’ jong ki. Ngi ïohi ruh ba don pat ki shnong kiba rai ban pyrshah ban leit thep vote kaba long pyrshah ïa ka hok thep vote (voting right) jong ki paidbah. Kaba kham ithamula shuh shuh ka long ba don ki kynhun shnong bapher bapher kiba la ïa rai bad pynpaw shai kdar ban kyrshan tylli tyllan tang sha uwei u kyrtong jong ka seng uba ki kwah ban pynjop ïa u. Kane lei-lei ka la pynkheiñ lypa pylleiñ-pylleiñ ïa ka hok thep vote jong ki paidbah ne secret ballot (secret voting). Lada ki seng saiñpyrthei ki byrngem ban ai mukotduma, ki dei ban ai lang salonsar khlem leh shiliang ïa kino-kino ki dorbar shnong. Lada leh tang ïa kawei, kata, kam itynnad satia.
Lada ki seng saiñpyrthei ki la ïatyngkhuh lypa bad ki bor pynïaid shnong ha shwa ban long ilekshon, ynda la jop lei, la i sheptieng ïoh ki nangleh beiñ, ñiewbeiñ, kin leh bym salia bad leh khla katba mon (dominate) ïa ki bor pynïaid shnong (traditional institutions). Lada ka long ha kata ka rukom, ki ban ïap (victims) dei ki paidbah namar, ka ktien ka maham ba lada ïakhun ki hati, nang ïap pynban u phlang.
