Shillong, K’lyngkot 29
Ki paidbah nongshong shnong jong ka Modop Nartiang ki la pynpaw ïa ka jingsngewkhia kaba jur halor ka jingkiew jong ka bai bording kaba long arshah na kaba ki ju siew ha ki bnai ba la dep.
Ha ka kyrwoh khubor, ki la pynpaw ba ki dap da ka jinglyngngoh ïa ka jingkiew bai bording kaba long arshah bad ki kwah ruh na ka liang ka MeECL kan pynshai halor kane naba kum ki nongshong shnong ki mad ïa ka jingeh.
La ong ba ha ki bnai ba la dep, ka bai bording kaba poi T.300 mynta ka poi haduh T.700, kaba poi T.500 mynta ka poi haduh T.1200 lane T.1300, kaba poi T.1000 mynta ka poi haduh T.2000 lane tam.
Ki la pynpaw ba kane ka jingpynkiew bai bording ka la ktah shi katdei eh ïa ki nongshong shnong kiba pyndonkam bording khamtam lei kito kiba duna ha ka ïoh ka kot bad kiba bylla mynsngi bad bam da miet.
Ha kawei pat ka liang, ki nongshong shnong ka Modop Nartiang ki la pynpaw ruh ka jinglyngngoh ïa ka jingbym shimkhia jong ka MeECL ha ka ban ker sawdong ïa u transformer uba don hapoh ka shnong, uba buh jingman shi katdei eh ïa ki nongleit-nongwan bad khamtam ïa ki khyllung khynnah. Na ka liang jong ki nongshong shnong ki la buh jingkylli ruh ba lada kylli na ka ophis balei kam leh eiei ban ker? Ka jubab ka long ba ym don skhim hynrei lada don pat ki jingjia ba sngewsih, ka ïarap pisa pat da ki lak tyngka. Ki la ong, hato ka MeECL ka ap beit haduh ban da jia ki jingjia ba sngewsih ban ïarap pisa? Ki la kyrpad ïa ka MeECL ba kan pynshai halor kane.
