Shillong, K’lyngkot:
U kyrtong MDC ka Congress ban aireng na Nongkrem konstitwensi, Bah Lamborsing Nongrum u la ong ba baroh ki dei kiba ieid jaidbynriew, hynrei ban ieid jaidbynriew donkam ban ieid shwa ïa la ka jong ka ïing ka sem, bad ban ruh ba lada kwah ïa ka jingkylla dei ban sdang shwa na lade bad na la ïing.
Haba pan jingkyrshan na ki paidbah ka Nongkrem konstitwensi ha kane ka ilekshon MDC, u Bah Lamborsing Nongrum uba dei u trai shnong na Nongkrem, u la kyntu ïa ki paidbah ban ailad ïa u shisien ba un pyni da ki kam kumno u ieid ïa ka jaidbynriew.
“Kumno ngi lah ban ong ba ngi ieid jaidbynriew, katba ha ïing ngim peit. Lada ngi kwah ka jingkylla ngi dei ban sdang shwa na la ïing ban wanrah ka jingkylla, naduh ma nga u trai met nga dei ban sdang ban pyni ïa ka jingkylla ban trei ïa ka kam ba la bynshet na ka bynta ka ïing ka sem. Jan baroh ki rangbah hapoh ka ri Khasi kiba ieid suda ïa ka jaidbynriew. Ailad ïa nga ba ngan pyni ba nga ieid ïa ka jaidbynriew da ka kam, ba ngan pynshisha ïa ka nongrim kaba nga don”, la ong u kyrtong ka Congress.
Haba kylli, u la ong ba u sngewskhem ban ïoh ïa ka jingjop pyrshah ïa u MDC ba mynta bad ïa u kyrtong ba la sei ka VPP. “Kam don jingpher, nga dei u trai shnong bad nga tip kham bha ïa ka jingeh jong ka thaiñ bad ka konstitwensi”, u la ong.
“Hapoh district council ngan leit ban pynbha ban pynskhem kumno ban ïoh ïa ka jingïada ha kaba ïadei bad ka khyndew ka shyiap, khamtam ka riti dustur. Ngi donkam ban pynskhem ïa ka riti dustur kaba la don ym ban pynkylla ïa ka”, la ong u Bah Lamborsing.
Ha kane ka ilekshon MDC ka ban sa long ha ka 21 tarik Rymphang, ka Nongkrem konstitwensi haduh mynta ka dei kawei konstitwensi kaba duna ki kyrtong ban mih aireng. Kumba ka long haduh mynta na katei ka konstitwensi dang don tang 3 ngut ki kyrtong, kata u MDC ba mynta, Bah Lambor Malngiang uba la pynbna ban ïakhun kum u kyrtong shimet, ka seng Congress ka la pynbna ban pynïakhun da u Bah Lamborsing Nongrum bad ka Voice of the People Party (VPP), kaba u MLA katei ka konstitwensi u dei u President ka la pynbna da u Bah Kitbor Syiem kum u kyrtong.
U Bah Lamborsing Nongrum u la ïakhun ha ki artylli ki ilekshon MDC, kata ha ka ilekshon shiteng samoi ha u snem 2016 hadien ba la iehnoh u Bah Ardent M Basaïawmoit ïa ka jinglong MDC bad ha u snem 2019, ha kaba u la wan ba ar ha katei ka ilekshon.
