Shillong, K’lyngkot 30
Ki sur jingrwai ki dei ki sur kiba pynkyndeh bha ïa ka mynsiem jong ki briew bad khamtam eh ha kum kane ka por mynta ba la jan ka ilekshon.
Kumta ka Khun Hynñiewtrep National Awakening Movement (KHNAM) ha ka 30 tarik u Kyllalyngkot, 2025 ka la pyllait paidbah ïa kawei ka jingrwai kyrsiew thiah ïa kaba la ai kyrteng “Na ka bynta ka Ri” ba la thoh da u Bah Joseph Pyngrope bad ba la rwai pat da u Bah Augustine Pyngrope ïa kaba la pyllait ha Shillong Press Club.
Haba kren sha ki lad pathai khubor, u Working-President ka KHNAM, Bah Thomas Passah, u la ong ba ha u snem 2002 ba la pynkha ïa ka seng, ka seng ka la wanrah ïa ka jingrwai ha kaba ka jingthmu ka dei ban pyrshang ban kyrsiew thiah ïa ki paidbah ym na ka jingïohthiah jong ka met hynrei ban kyrsiew thiah na ka jingïohthiah jong ki jingmut-jingpyrkhat. Kumta ha kane ka kynti kaba mynta ruh hadien kumba 23-24 snem, na ka liang ka seng ka la pyllait paidbah sa ïa kawei ka jingrwai kyrsiew thiah jong ka seng.
“Hadien 23-24 snem, na ka liang ka seng ngi la wanrah sa kawei ka jingrwai halor kajuh ka jingthmu ban kyrsiew thiah ïa ka jingmut-jingpyrkhat u paidbah khnang ba kan don ka jingmyntoi ïa ka pateng kaba mynta bad ki pateng kiba hadien”, ong u Bah Passah.
U Bah Passah u la ong ba u kyrmen skhem ba kane ka jingrwai kan pynlong ïa ki paidbah ba kin kham pyrkhat jylliew bha ïa kiei-kiei baroh na ka bynta ka ri bad ka jaidbynriew.
Katba u Bah Joseph Pyngrope uba dei u Working President jong ka State Youth Wing ka KHNAM bad uba dei ruh u nongthoh ïa katei ka jingrwai, u la ong ba ka jingrwai ka dei katkum ka nongrim jong ka KHNAM hi kata ka dei ban kyntiew, ban pynneh-pynsah bad ban ïada.
U la ong ba kane ka jingrwai kam dei tang ka jingrwai ïalap ilekshon hynrei ka dei ka jingrwai kyrsiew thiah ïa ka Bri u Hynñiewtrep kaba la shu ïohthiah lyngngai bad kaba buh pat ïa ka jingma kaba khraw bha ïa ka jaidbynriew.
