Nongpoh, K’lyngkot 31
U MLA barim ka Umroi konstitwensi, Bah George B. Lyngdoh ha ka Sngi Thohdieng u la thep kyrteng na ka bynta ban aireng ha kane ka ilekshon MDC na Umroi konstitwensi kum u kyrtong shimet uba nyngkong eh na baroh san tylli ki konstitwensi jong ka Ri-Bhoi District.
Ha kane ka sngi ïa u Bah George B. Lyngdoh la wan ban synran lang da u Bah Arbinus Lyngdoh, MDC barim ka Umroi konstitwensi.
Nalor u Bah George B Lyngdoh, 3 ngut ki kyrtong jong ka National Peoples’ Party (NPP) kiba kynthup ïa u Bah Sosthenes Sohtun na Jirang konstitwensi, Kong Rona Khymdeit na Nongpoh bad Kong Macdalyne Sawkmie Mawlong, ki la wan ban thep kyrteng ban aireng ha kane ka ilekshon MDC ka ban sa long ha ka 21 tarik u bnai Rymphang mynta u snem.
Katba na ka liang ka United Democratic Party (UDP) ki la don 5 ngut kyrtong kiba la wan ban thep kyrteng ha kane kajuh ka sngi kiba kynthup ïa u Bah Balajied Rani na Nongpoh Konstitwensi, u Bah Lee Bareh na Jirang konstitwensi, u Bah Eddie G. Kharbani na Umsning konstitwensi, u Bah James Sylliang na Mawhati konstitwensi lem bad ka samla Naphishisha Marweiñ na Umroi konstitwensi.
Haba kren sha ki lad pathai khubor hadien ka jingthep kyrteng, u Bah George B. Lyngdoh u la ong ba ka jingwan thep kyrteng jong u ban aireng ha kane ka ilekshon MDC ka dei ba u don ka jingangnud ban shakri ïa ki paidbah ka Umroi konstitwensi bad kumba ki paidbah ki la ithuh bha ïa u kum u MLA jong ki uba la shakri la 5 snem ha ki snem ba la dep. Kumta mynta ka kynti ruh u buh ka jingkyrpad sha ki paidbah ba kin ailad ba un mihkhmat ïa ka Umroi konstitwensi sha ka District Council.
Haba phai pat sha ki mat ki jura kiba un ïakhun lada ki paidbah ki jied ïa u ha kane ka kynti kum u MDC, u Bah George u la ong ba ka thong hi ka long ban ïakhun ïa ki jingeh kiba bun khamtam kiba ïadei bad ki aiñ ki kanun kiba la shna naduh ki por ba la seng ïa ka District Council khamtam kum ka ‘Trading License’, ‘Labour License’, kiba la ktah ïa ka ïoh kam ïoh jam jong ki paidbah nongshong shnong khamtam ha Umroi konstitwensi kaba don shibun ki ophis treikam Sorkar Jylla bad Sorkar Kmie ruh kumjuh nalor kiwei-kiwei ki nong sengkam sengjam.
Ha kaba ïadei bad ka riti bat khyndew kaba kyrpang jong ka Ri-Bhoi bad kyrpang ïa ka Umroi konstitwensi, u Bah George u la ïathuh ba kumba la sakhi, kiba bun bah ki longïing khamtam kiba sah kynthei khynnah ki shem jingeh ban ïoh wat tang shi nongrim ïing bad ai jingïaroh pat ïa kito ki shnong kiba shim jingkitkhlieh ban ai lane pynïoh nongrim ïing ïa la ki jong ki khun ki kti jong ki paidbah nongshong shnong haba ki mih ïing.
Haba pyrshang kylli, kaei pat kaba pynlong ïa u ban ym rung sha kano-kano ka seng saiñ hima sima ha kane ka kynti, u Bah George u la ong ba ha ka jingpeit jong u, u la thait ïa ki seng saiñ hima bad ki nongïalam ki jong ki namar hateng-hateng la ïohi ba ka jingïamir jingmut ka long tang hapdeng ki ar ne lai ngut ki nongïalam kaba poi pat sha ka jingjot jong ka seng bad ki paidbah nongbud.
“Ka pynlehraiñ ruh ïa ngi ban leit hakhmat jong ki paidbah ba shiphang da kumne, shiphang da kumtai ha ka jingkylla jong ki nongïalam bad ki rai ki jong ki. Na kata ka daw, nga sngew ba ngin leit kum u ‘Independent’ ban laitluid na kita kiei-kiei baroh. Ha ki san snem ba nga la long MLA, kawei kaba nga la ïoh ka jinghikai na ki paidbah, ka long ba ki paidbah kin shaniah ha nga, nga ngan shaniah ha ki paidbah, kata hi kaba kongsan tam na ka bynta jong nga ha kane ka thong kaba mynta,” la ong u Bah George.
Na ka liang ka Kong Macdalyne Sawkmie Mawlong bad u Bah Balajied Rani, kiba dei mynta kum ki MDC na Umsning bad Nongpoh, ki la ong ba ha kane ka jinglong MDC ka jong ki la hynriew snem, ki la ïoh ban pynlong aiñ ïa shibun tylli ki ‘Bill’ bad pynpaw ba lada ki paidbah kin jied biang ïa ki ha kane ka kynti kaba mynta, kin ïaleh ban buddien na ka bynta ban pynlong aiñ sa kiwei ki bynta kiba dang sahteng kum shi bynta ban wanrah ïa ki aiñ kiba khlaiñ bad kiba skhem na ka bynta ka jingshngaiñ jong ka jaidbynriew.
Kiwei-kiwei ki kyrtong kiba dang thep kyrteng ha ka sien kaba nyngkong ha kane ka sngi, ki la pynpaw ba ka thong kaba kongsan hi ba kin leh lada ki paidbah ki ibit ban jied ïa ki kum ki nongmihkhmat sha ka KHADC ka long ban pynkhlaiñ ïa ka jaidbynriew naduh ki rangbah, ki longkmie bad ki samla ruh kumjuh, ban ïada ïa ka riti ka dustur, ka khyndew ka shyiap bad kiwei-kiwei ki mat kiba kum ka jaidbynriew ka kynduh jingeh namar ka jingbym don lane ka jingbymtreikam wat ki aiñ kiba la don lypa.
