Shillong, K’lyngkot 31
U nongïalam ka United Democratic Party (UDP), Bah Allantry F Dkhar u la ong ba ka UDP lyngba ka jinglong Executive Member (EM) u Bah Paul Lyngdoh ha KHADC ka la trei tyngeh ban pyrkhing ïa ka laisen khaïi lane trading license haduh ba ka ophis u Myntri Rangbah -duh ka ri u Narendra Modi ka la tuklar bad buh jingkylli.
U Bah Dkhar u la pynpaw ïa kane ha ka Sngi Thohdieng hadien ba la dep thep kyrteng ki kyrtong ka UDP na Jaïaw konstitwensi bad kiwei kiwei ki konstitwensi.
U la ong ba wat u Myntri Sorkar u Bah AL Hek uba dei u MLA ka BJP u la leit ïuh kjat ha KHADC na ka bynta ka kam khaïi jong kiwei pat, kumjuh ruh u MLA ka BJP u Bah Sanbor Shullai.
U la ong ba kine ki dei ki matti ka UDP lyngba u Bah Paul Lyngdoh ha ka por ba u shimti kum u EM ka tnat khaïi ha KHADC, uba la trei ruh kum u MDC ka Jaïaw konstitwensi Halor ka jingdon kiba kwah ïa ka Article 371 bad kiba ïakhun ruh ïa ka ilekshon MDC, une u nongïalam ka UDP u la ong ba ha kiba shemphang bad ki la sngewthuh, ka Article 371 ka dei tang ka jingpynbiej namar ka Article 371 kam lah ban donlang bad ka Sixth Schedule lane District Council na ka bynta ki jaitbynriew Khasi bad Jaiñtia ha Meghalaya. U Bah Dkhar u la ai nuksa ruh ïa ka jaitbynriew Mizo ha Mizoram kaba la duh noh ïa ka District Council hapoh ka Sixth Schedule jong ka Riti Synshar hadien ba la ïoh ïa ka Article 371, ha kaba kiwei pat ki jaitbynriew ha Mizoram kum ka jaitbynriew Lai, Chakma bad kiwei ki la ïoh ïa ka district council.
Kumta une u nongïalam ka UDP u la ong ba ka paw shai mynta ba kata ka seng kaba kwah ïa ka Article 371 ka kwah ban ai noh ïa ki District Council sha kiwei pat ki jaitbynriew ha Meghalaya kum ka jaitbynriew Koch, Rabha bad Hajong. Kumba ka long mynta ka Meghalaya ka don lai tylli ki district council; ka Khasi Hills Autonomous District Council, Jaiñtia Hills Autonomous District Council bad Garo Hills Autonomous District Council katkum ka Sixth Schedule jong ka Riti Synshar ka ri India ban ïada ïa ki jaitbynriew ritpaid.
Kum ban shu kdew, ka jaitbynriew Mizo ha Mizoram ka la don la ka jong ka District Council hapoh ka Sixth Schedule hynrei ynda la ïoh ïa ka Jylla Mizoram, ka jaitbynriew Mizo kam don District Council shuh bad ïa ki District Council la ïoh da ki lai tylli ki jaitbynriew, kita, ka jaitbynriew Chakma, Lai bad Mara kiba dei ki jaitbynriew ritpaid ha Mizoram.
