Shillong, Rymphang 02
U Bah Nathanial Rymmai uba dei u kyrtong ka Congress na 22-Nongspung-Sohïong Consti-tuency bad uba dei ruh u khun jong u MLA barim ka Sohïong Constituency, Bah HDR Lyngdoh (Bam Kwai ha Dwar u Blei) u la wan ban thep kyrteng ïalade hakhmat u Returning Officer (RO) ha ka shlem treikam ka Deputy Commissioner (DC) ka East Khasi Hills District na ka bynta ban ïakhun ïa ka ilekshon MDC sha Khasi Hills Autonomous District Council (KHADC) ka ban sa long ha ka 21 tarik u Rymphang, 2025.
Haba ai jingkren sha ki lad pathai khubor hadien ba la dep ban thep kyrteng, u Bah Nathaniel Rymmai u la ong ba ka jingmih jong u shakhmat ban ïakhun ïa ka ilekshon MDC ka dei namar ka jingieid jong ki paidbah ïa u kpa jong u kaba la pynlong ïa u pat ba un don ïa ka jingkitkhlieh ban siew kylliang ïa ki da ki kam babha.
U la ong ba ka jing-ïaleh jong u ïa ka ilekshon na ka Congress ka dei hadien ka jingïamir jingmut bad ki paidbah nongkyrshan kiba la pynsngew ruh ha u ban leit rung beit sha ka Congress namar ka dei ka seng kaba don ïa ki nongrim kiba biang bad kaba don ruh ïa ka tynrai kaba skhem.
“Kawei ka dei beit ka jingieid jong u paidbah ïa i Pa kaba nga hap ban siew kylliang ïa ki da ka kam babha bad ka jingwan ki paralok jong i Pa bad ki nongkyrshan jong i man la ka sngi, kiba la phaikhmat beit sha ka ïing jong i Pa, kumta nga kum u khyn shynrang, nga hap ban mih ban buddien ïa ki matti jong i”, ong u Bah Nathaniel.
Haba ïadei bad ka jinghap ban ïakhun jong u ïa ka ilekshon MDC na katei ka konstitwensi pyrshah ïa u Bah Synshar Kupar Roy Lyngdoh Thabah uba dei u MLA ba mynta ka Sohïong Constituency bad ba ki ïadei ruh shi bakha trai, u Bah Nathaniel u la ong ba ha ka kam synshar paidbah hi, yn nym lah satia ban khang ïano-ïano ban ïakhun ïa ka ilekshon da kaba bynrap ruh ba ka kam ïing-kam sem ka ïaid la ka jong bad ka kam saiñ pyrthei ruh kan ïaid la ka jong.
“Ha ka kam synshar paidbah hi, baroh ki don ïa ka hok ban ïakhun ïa ka ilekshon bad yn nym lah ban khang. Nga don ïa la ka jong ka thong bad kiwei ki kyrtong ruh ki don ïa la ka jong ka thong.
Kum ban shu kdew hangne, u Bah Synshar u la jop ïa ka ilekshon MLA na ka United Democratic Party (UDP) na Sohïong Constituency hadien ba u la mih bujli ha ka jaka jong u Bah HDR Lyngdoh uba thmu ban aireng na ka seng UDP hynrei u ba la khlad noh pat na ka sla pyrthei hashwa ka ilekshon MLA ha u snem 2023 da kaba pynliem noh ïa u Bah Samlin Malngiang u ba dei u kyrtong ka seng National Peoples’ Party (NPP).
U la ong ruh ba ki don shibun ki kam kiba u hap ban trei na ka bynta ka konstitwensi hynrei kaba donkam ka dei ba ki paidbah kin ailad shwa ïa u ba un shong ha ka shuki bad hadien kata un sa sdang ban trei bad ban peit ïa ki kam kiba donkam tam na ka bynta ka konstitwensi baroh kawei.
