Nongstoiñ, Rymphang 11
Ka kynhun ïalehkai jong ka Khliehmawlieh YC ka la wan phai da ka jingjop ha ka lympung ïalehkai Super Division jong ka NDSA Premier League Football Tournament 2024-25 ba la pynlong da ka Nongstoiñ District Sports Association.
Katei ka jingjop jong ka Khliehmawlieh ka la wan hadien ba ka la lah ban pynliem noh da 5-0 kol ïa ka Tiehsaw Pengkyllut ha ka Sngi Ba-ar ha madan New Nongstoiñ. U Kyntiew Marthong u la ïoh ïa ka hat-trick hadien ba la ïoh ban thep ha ka minit kaba 33, 47 & 87, katba ïa kiwei pat la thep da u Kyrshan Marthong (57) bad Fulding Mawlot (61).
Haba phai pat sha ka jingïalehkai ha ka First Division, ka Sap Ki West ka la pynliem noh ïa ka kynhun ïalehkai jong ka Porshangbet da 3-1 kol ha madan New Nongstoiñ.
Ha kane ka jingïakhun ka Porshangbet ka la ïoh ban pynkhih jar nyngkong eh lyngba u Stevenson Sohlangpiaw ha ka minit kaba 24, hynrei hadien shiteng kynta ka Sap ki West la lah ban pynphai kylla lyngba u Raplang Snaitang ha ka minit kaba 39 na ka bynta ban ïakhaid mar shi kol ha ka kylla step.
Ka Sap ki West ka la thep biang sa ar kol ha ka kylla miet lyngba u Bejoy Nongsiej ha ka minit ba 74 bad u Honimingstone Nongkhar (80) na ka bynta ban ïoh jingjop shisyndon.
