Shillong, Rymphang 11
Ka United XI ka la ïoh jingjop ha ka Super Division Shillong Cricket League 2024-25, hadien ba ka la lah ban pynliem noh ïa ka Lumpyngngad SCC da 23 run ha ka Sngi Ba-ar ha madan Polo.
Kane ka la wan urlong lyngba ka jingïalehkai bha ki nongkawang bol kata u Bijon Dey uba la ïoh 5 wiket lem bad 2 wiket na u Sudhir Sahani na ka bynta ban pynlong ïa ka Lumpyngngad kaba la shimti ïa ka pali ba ar ban ïoh tang 125 run bad shah pynhap 10 wiket ha ki 33.4 over. U Abhay Kumar Rai u la tied 41 run na ki 63 bol bad u Samir Shah (not out) u la ïoh 21 run na ki 51 bol.
Kham ha shwa, ka United XI kaba la kam trai ban tied nyngkong ka la ïoh 148 run bad shah pynhap 10 wiket ha ki 39.3 over. U Jason J Lamare u la tied 32 run na ki 64 bol bad u Indranil u la ïoh 21 run na ki 46 bol. Katba u Nitin Gupta u la ïoh 4 wiket bad ïa ki 3 wiket la ïoh da u Vishal Kumar Balmiki. Ïa ka nam Player of the Match la ïohpdiang da u Bijon Dey.
