Shillong, Rymphang 11
Ka lympung ïalehkai 4th District League T20 Cricket Tournament 2024 ba la pynïaid da ka East Khasi Hills Cricket Association ka la nangjam shaphrang ha kaba ka Saitsohpen bad ka Sohra Combines ki la ïoh jingjop ha ka Sngi Ba-ar.
Ha kane ka jingïakhun kaba la long ha Saitsohpen kaba ha Sohra, ka Saitsohpen ka la pynliem noh ïa ka Rangshken ACC da 32 run. Ka Saitsohpen kaba la kam trai ban tied nyngkong, ka la ïoh 171 run bad shah pynhap 7 wiket ha ki 20 over. U Bhakupar Khongwir u la tied 48 run na ki 41 bol. Katba u Hamostar u la shim 4 /22 na ka bynta ki 4 over.
Haba wan beh ïa ka thong ba la buh da ka liang pyrshah, ka Rangshken ka la ïoh 139 run bad shah pynhap 9 wiket ha ki 20 over. U Sankiewnam Lyngdoh u la khyrwit ïa ka shiteng spah kaba 62 run na ki 49 bol. Katba u Holding Mewell Surong u la shim 2/14 na ka bynta ki 4 over. Ïa ka nam Player of the Match la ïohpdiang da u Bhakupar Khongwir.
Haba phai sha kawei pat ka jingïakhun kaba ar, ka Sohra Combines ka la jop da 36 run ïa ka Cricket Smit. Ka Cricket Smit kaba la jop ïa ka kynting pisa, ka la ailad ïa ka Sohra Combines ba kan tied nyngkong ha kaba ka la kamai 106 run bad shah pynhap 7 wiket ha ki 20 over. U James Marbaniang u la tied 25 run na ki 15 bol. Katba u Pynlong Khongshei u la shim 2/18 na ka bynta ki 4 over.
Haba wan beh ïa ka thong, ka Cricket Smit ka la kamai tang 70 run hadien ba ka la shah pynkhyllem baroh ki nongtied ha ki 16 over. U Nikodomas Lyngwa u la tied 27run na ki 30 bol. Katba u Donkyrmenlang Nadon u la shim 4/11 na ka bynta ki 4 over. Ïa ka nam Player of the Match la ïohpdiang da u Donkyrmenlang Nadon.
