Shillong, Rymphang 11
Ka Indian Olympic Association (IOA) ka la phah da ka jingthoh sha ka Sorkar Jylla ban pynlong ïa ka 39th National Games ha u snem 2027 bad kane ka jingpynbna ka long kum ka jingsah kynmaw namar ka Jylla ka la ïoh ruh ban rakhe ïa ka jingdap 50 snem ka jingïoh ïa ka jylla ba pura.
Ha ka shithi na ka P.T. Usha, President ka IOA sha u Myntri Rangbah ka Jylla u Conrad K. Sangma, ka la pynpaw ka jingïaroh halor ka jingshim khia ban kyntiew ïa ki jingïalehkai bad ka jinglah jong ka ban pynlong ïa kane ka lympung ïalehkai kaba heh.
Te kumta na ka liang ka kynhun jong ka Jylla kin leit sha Uttarakhand, kaba dang pynlong ïa ka 38th National Games ba kin pdiang ïa ka lama jong ka National Games ha ka sngi pynkut ïa katei ka lympung ha ka 14 tarik mynta u bnai. Kine ki kynthup ïa u Myntri Rangbah ka Jylla, kumjuh u Myntri ka tnat ïalehkai u Bah Shakliar Warjri, ki nongmihkhmat na ka tnat ïalehkai, ki nongïalam ka Meghalaya State Olympic Association, ki nongïaleh-kai lem bad ki coach jong kane ka Jylla.
Haba pynpaw halor kane ka jingpynbna, u Myntri Rangbah ka Jylla u la ong, “Ka National Games ka dei ka dak jong ka jingthmu ban kyntiew ïa ki sap ha ki jingïalehkai. Ka thaw ïa ki nongmuna bad ki khana jong ka jingïaishah kiba ai mynsiem. Ka long ka burom ïa ka Meghalaya ban pynlong ïa kane ka lympung ïalehkai bad ban ïoh ïa ki samla jong ngi ban shim bynta da ka jingkmen jong ki jingïalehkai!”
Kumjuh, u Myntri ka tnat ïalehkai u la ïasam ïa ka jingkmen jong u ha kaba ïadei bad kane ka jingpynbna, da kaba ong, “Ka Meghalaya ka la ïohi ïa ki jingkylla kiba khraw ha ka liang ki kam ïalehkai bad ka long kaba la khreh ban shah kheiñ hapdeng ki nongïalehkai ba khlaiñ bor jong ka ri. Ngi khmih lynti ban pdiang sngewbha ïa ki nongïalehkai bad ki paidbah kumjuh sha Megha-laya ban mad ïa baroh kaba ka Jylla kan tyrwa sha ki!”
Ha ka jingshisha ka National Games kaba 39 la dei ban pynlong ha u snem 2022 hynrei la pynslem namar ka khlam Covid-19 bad ka jingkylla ka por na ka bynta kiwei pat ki jylla kiba thmu ban pynlong ïa kane ka jingïalehkai. Naduh kata ka por, ka Jylla ka la bteng ban pynleit jingmut na ka bynta ki nongïalehkai bad ban pynbiang ïa ki jaka ïalehkai hapoh ka Jylla. Kane ka jingpynbna ka wan ruh hadien ka jinglah ka Jylla ban khur tama ha ka 38th National Games hadien 14 snem ka jingïaid lynti jong ka.
Ha katei ka lympung ka Jylla ka la lah ban khur haduh 5 tylli ki takma lyngba ki nongking-lieng, kiba kynthup ïa kawei ka takma ksiar, ar ki takma rupa lem bad ar ki rnong.
Ka jylla Meghalaya ka la dep ban sdang ïa ka jingpynkhreh na ka bynta kane ka lympung ha ryngkat ka jingïatreilang bad ka MSOA, ha kaba la ithuh haduh 40 tylli ki jait jingïalehkai ban bishar bniah.
Shuh shuh, ka Jylla kan pynlong ïa kane ka lympung bah ha baroh lai tylli ki nongbah kata ha Shillong, Tura, bad Jowai. La antad ba haduh shiphew hajar ngut ki nongïalehkai kin wan ïashim bynta ha kane ka lympung.
Te kumta ka jingpynkhreh ka Jylla ka dang ïaid shakhmat ïa ki jaka ïalehkai bapher-bapher kynthup ïa ka J.N. Sports Complex, kumjuh la lah ban pyndep ïa ka P.A. Sangma Sports Complex, bad ka Wahïajer Stadium ban pynlong ïa katei ka lympung, nalor kiwei ki jaka ïalehkai kum ka Mawdiangdiang Sports Complex bad ka Integra-ted Hospitality and Sports Complex kaba dei ruh kaba la khreh.
