Shillong, Rymphang 11
Ka Green Heart Boxing Academy/Club kaba long kawei na ki shlem ai jinghikai na ka bynta ki khynnah kiba don ïa ka sap ïakura, kan pynlong ïa ka jingpyrshang (trials) na ka bynta ban pynrung ïa ki khynnah ki ban ïoh ka jingshah hikai kaba pura na ka bynta u snem 2025.
Kane ka prokram jied kan long ha ka 15 tarik mynta u bnai ha Indoor Sport Hall kaba ha Mawlai Mawroh, Shillong naduh ka por 9 baje mynstep.
Kane ka jingjied kan long katkum ka jingkoit jingkhiah ha ka met, ka sap ha ka jingtbit ban ïalehkai ïakura, ka jingïadei shimet bad ki nongïashim bynta. Kiba don jingthmu ban ïoh ka jingshah hikai kin hap ban wan ai jingtip ha katei ka por. Ka rta jong ki khynnah shynrang bad kynthei ka long naduh 12 snem shaneng bad shapoh 20 snem. Ka jingthmu ba kongsan jong kane ka shlem ai jinghikai ka long ban ai jinghikai bad kin ïoh ka lad ban mihkhmat ïa ka Jylla ha ka Regional, National bad International Boxing Competition bad khamtam eh ha ka 39th National Games ka ban sa long ha ka jylla Meghalaya ha u snem 2027. Kane ka long kat kum ka kyrwoh ba la pyllait da u Bah Larry Kharpran, President ka Green Heart Boxing Academy/Club.
