Shillong, Rymphang 25
Wat la ka Voice of the People’s Party (VPP) kaba dei ka seng thymmai kaba don tang 4 ngut ki MLA kiba shong ha ka liang pyrshah ha ïingdorbar thawaiñ ka jylla hynrei ki kyrtong jong ka VPP ki la pynliem lyndang ïa ki kyrtong ha ki konstitwensi ba pynïeng da ki Myntri Sorkar Meghalaya Democratic Alliance-2 ha kane ka ilekshon MDC sha Khasi Hills Autonomous District Council (KHADC).
Ka Lyngkyrdem-Laitkroh konstitwensi kaba ki paidbah ki khmih lynti ba u kyrtong ka NPP Bah Rahboklang Tynsong un ïoh ïa ka jingjop namar u dei pyrsa trai jong u Symbud Myntri Rangbah ka jylla Bah Prestone Tynsong. Ynda la ñiew ïa ki vote ha ka 24 tarik mynta u bnai, u kyrtong jong ka VPP Bah Shemborlang Rynjah u la lah ban pynliem noh da 1489 vote, kata hadien ba u la ïoh haduh 11279 vote bad u kyrtong ka NPP Bah Rahboklang Tynsong u la ïoh 9790. Katba u kyrtong ka UDP uba dei MDC Bah Ryngkatlang Lyndem u la ïoh tang 1217 vote.
Lada phai sha ka Laitumkhrah-Malki Konstitwensi, ki paidbah ki khmih lynti ba u kyrtong ka NPP uba dei u MDC Bah Fantin Joseph Lakadong bad ruh u kurim jong ka Kong Ampareen Lyngdoh kaba dei ka Myntri ha ka Sorkar Jylla kaba la jop bunsien kum ka MLA hynrei khlem poi pyrkhat ba un wan sha ka kyrdan ba lai. Ka kyrtong na ka VPP ka Kong Deity H Majaw ka la ïoh jingjop da kaba ïoh 4961 vote bad tam da 819 vote ïa u kyrtong Congress Bah Manuel Badwar uba wan ba-ar bad ïoh 4142 vote, katba u Bah Fantin Lakadong u la ïoh tang 3611 vote.
Haba phai pat sha ka Jaïaw-Mawprem Konstitwensi, hangne ruh ki paidbah ki la khmih lynti bha ba u kyrtong ka UDP Bah Auguster Jyrwa un rah ïa ka jingjop namar la kyrshan da u Myntri ka Sorkar Jylla Bah Paul Lyngdoh hynrei u la ïoh tang 3558 vote bad ban shah rem noh da 1905 vote ha u kyrtong ka VPP Bah Denzil R Chen uba la ïoh 5463 vote.
Katba ka kyrtong HSPDP na Parïong-Mawthadraishan Konstitwensi ka Kong Phinda Warjri kaba dei ka hynmen jong u Bah Shakliar Warjri, MLA bad Myntri ka Sorkar ha kaba ki paidbah ki la khmih lynti bha ba kan ïoh jingjop. Pynban khlem poi pyrkhat ha ka sngi ñiew vote ka la shah pynliem noh ha u kyrtong ka VPP Bah Powell Sohkhlet da 3897 vote, hadien ba u Bah Powell u la ïoh haduh 16140 vote bad ka Kong Phinda Warjri ka la ïoh 12243 vote, katba u kyrtong ka UDP uba dei u MDC Bah Jambor War u la ïoh tang 2221 vote.
