Shillong, Rymphang 25
U nongaiktien ka Voice of the People Party (VPP), Dr. Batskhem Myrboh u la ong ba ki paidbah jong ka Khasi Hills ki la kwah ban ïohi ïa ka jingkylla hapoh ka Khasi Hills Autonomous District Council (KHADC), kumta ki la ai ka jingjop kaba pura ïa ki kyrtong kiba la pynïeng da ka VPP ha baroh ki konstitwensi lait noh tang katto- katne ki konstitwensi ki bym shym la lah ban ïoh ïa ka jingjop.
Ha ka jingïakren bad ki nongthoh khubor, na ka liang u Dr. Myrboh u la pynpaw ïa ka jingsngewnguh ïa ki paidbah jong ka Khasi Hills ba hap hapoh ka KHADC kiba la ai ka jingjop ïa ki 17 ngut ki kyrtong jong ka VPP. U la ong ruh ba kane ka dei ba ki paidbah jong ka Khasi Hills ki la kwah eh ban don ka jingkylla hapoh ki Autonomous District Council.
“Ngi la don ka jingkyrmen ban jop kham bun ha kane ka ilekshon, hynrei ngi sngewkmen ïa kaei kaba ngi la ïoh hynrei ngin sa wad bniah pat ïa ka daw ha kiwei pat ki konstitwensi kiba ngim shym la jop,” u la ong.
U la ong ruh ba hadien ba ngi la dep ban ïit bniah ïa ki daw halor ka jingbymlah jong ngi ban jop ha ki 12 tylli ki konstitwensi ngin sa kham pynbha shuh-shuh ïa ki rukom treikam jong ngi khnang ba ngin lah ban leh bha ha ki ilekshon ban sa wan.
Haba kylli, u la ong ba ka VPP ka dei ka seng kaba bat pyrkhing bha ïa la ki nongrim treikam jong ka. U la pynkynmaw ruh ba ka la don ka jingthmu ban don ïa ka kynhun synrop ha ka ban thaw sorkar ha u snem 2023 bad na ka liang ka seng ka la buh ïa ki kyndon ha shwa ban ïa don bynta bad kane ka kynhun synrop. Kumta ki mat treikam bad ki rukom treikam jong ka seng ki wan ha khmat ha shwa ban shim ïa kino-kino ki rai.
Ha kaba ïadei bad ka jingjop jong ka VPP tang 8 tylli ki seat hapoh ka Jaiñtia Hills Autonomous District Council (JHADC), na ka liang u Dr. Myrboh u la ong na ka liang ka seng ngi la sngewthuh ba ka long kaba eh bha.
Ngi la ïohsngew na ki kyrtong jong ngi ba ka don ka jingpyndonkam ïa ka bor bad ka pisa khamtam eh ka jingpyndonkam ïa ka bor,” u la ong. Ngi pdiang ïa ka rai jong u paidbah kaba u la ai bad ngi ai khublei ruh ïa ki paidbah kiba la mih na kylleng ka Ri lum Jaiñtia kiba la ai ka jingkyrshan ïa ka VPP bad ngin ïai trei shitom ha ka ban shakri ïa ki paidbah lyngba ka seng.
“Ngin sha ïa shong pyrkhat bad ki MDC na JHADC ha shwa ban shim ïa kano-kano ka rai, ka VPP kam dei ka seng kaba rhah bor hynrei ngi buh nyngkong eh ïa ka nongrim bad saiñ pyrkhat jong ka seng bad ngin sa shim ïa ka rai kumba dei ban shim,” u la ong.
U la ong ruh ba ka jingrung ka VPP sha ka Jaiñtia Hills ka la wanrah ïa shibun ki jingkylla ha ka liang ka synshar ka khadar bad ngi kyrmen ba ha ki snem ki ban wan lyngba ka jingrung ka VPP sha kine ki thaiñ lyngba ka jingai jingpynshai halor ka synshar ka khadar, ngi kyrmen ba shisien ka sngi ka VPP kan sa lah ban leh bha ha Jaiñtia Hills.
