Shillong, Rymphang 26
U Myntri Khynnah ka Sorkar Pdeng ba khmih ïa ka tnad DoNER, u Dr. Sukanta Majumdar ha ka Sngi Balang u la ong ba ka Sorkar Jylla ka dei ban pyndep noh ïa ki 10 tylli ki projek kiba sahteng ba la mang lyngba ka tnad.
“Ngi la don ïa ka jingïalang ha kaba ngi la khmih bniah ïa baroh ki projek kiba hap hapoh ka tnad DoNER bad kumba phi tip, hapoh ka jingïalam u Myntri Rangbahduh ka ri, u Narendra Modi bad u Myntri ka tnad DoNER, u Joytiraditya Scindia, ngi trei hapoh ka Thaiñ Shatei Lam Mihngi halor ka ‘5-Point Framework’,” ong u Dr. Majumdar haba kren sha ki lad pathai khubor.
U Myntri u la ong ruh ba ka Sorkar Jylla ka dei ban pynithuh ïa ki shnong ha ki jaka khappud na bynta ban kyntiew ïa ka roi ka kiew ha ka liang ki kam shna jingshna.
Haba kdew ba ka tnad DoNER ha ryngkat ka Sorkar Jylla kin ïatreilang ban pyndep pura ïa ki projek heh (hapoh ka Jylla) ba la mang hapoh ka tnad (DoNER), u Myntri u la ong, “Ka Sorkar Jylla ka dei ban pynsted ha ka ban pyndep ïa kumba 10 tylli ki projek ba sahteng.”
Haba ïadei bad kane, u Dr. Majumdar u la ong ba u la ïakren halor ka jinglong-jingman jong kine ki projek ba sahteng bad kumba ka long, ka Sorkar Jylla ka la leh ïa ka kam kaba bha bad ka kwah ban pyndep noh ïa baroh ki kam ha ka por kaba la buh.
U la ong ruh ba dang shen ka Sorkar Jylla ka la wanrah jingkylla ha kaba ka la pynngat ïa ka bynta ba ïadei bad ka ‘Logistics’ hapoh ka thup kyrdan jong ki karkhana.
“Kumta hadien kane, ka ‘logistic facility’ kan sa kiew hapoh ka Jylla bad kan kyntiew ïa ka ïoh kam ïoh jam ryngkat ki kam jngoh kai pyrthei bad kiwei-kiwei ki bynta,” u la ong.
Haba pynsngew ba u la ïakynduh ruh ïa u Myntri Rangbah ka Jylla, u Conrad K. Sangma, u Dr. Majumdar u la ong ba u Myntri Rangbah uba dei ruh u khlieh jong ka ‘Task Force’ haba ïadei bad ki kam jngoh kai pyrthei, u long uba kloi ban pynleit jingmut halor ki kam pynroi kiba hap hapoh ka tnad DoNER.
Halor ka jingphai khmat jong u Myntri Rangbahduh ka ri, u Narendra Modi sha ka Thaiñ Shatei Lam Mihngi bad ka jingwan jngoh ba na ka por sha ka por jong ki Myntri Sorkar Pdeng ïa ka thaiñ, u Myntri u la ong, “Hadien-habud, ki Jylla ka Thaiñ Shatei Lam Mihngi ba kynthup ïa ka Meghalaya kin sa long ka ‘Power Centre’ jong ka ri.”
Haba pynpaw ba ki Jylla ka Thaiñ Lam Mihngi khamtam ka Meghalaya ki long kiba riewspah ha ki kam jngoh kai, u Dr. Majumdar u la ong baroh ki Jylla jong ka thaiñ ki la mih shakhmat bad ‘Vision Document 2047’.
Shuh shuh u la bynrap, “Kumba u Modi u la ïohi jngai ba lada ka ri ka kynjoh ïa u snem 2047, kan sa kylla long ka ‘Viksit Bharat’ ne ka India kaba roi ba kiew, kumta khlem da kyntiew ïa ka roi ka kiew jong ka Thaiñ Shatei Lam Mihngi, ka jingangnud jong ka ‘Viksit Bharat’ kan ym lah ban poi sha ka thong.”
Na ka liang u Dr. Majumdar u la ïathuh ba u Scindia u lah ban wan sha ka Jylla ha u Lber bad ha ka jingdonlang u Myntri Rangbah, ka Jylla kan sa wanrah ïa ka ‘Vision Document’ – ka ban plie lynti pat ïa ka thong jong ka ‘Viksit Meghalaya’ bad ka ban kynjoh sha ka ‘Viksit Bharat’.
