Jowai, Rymphang 28
Ha ka jingjied ïa u Chairman jong ka JHADC, u MDC jong ka NPP na Bataw-Lakadong, Dr. Sankey Shangpung nam-ar lada kyllum lang baroh, ki MDC jong ka NPP, ka UDP bad u MDC shimet ki poi tang 18 ‘vote’, katba u Dr. Sankey u la ïoh haduh 20 ‘vote’ bad kane ka jingïoh ar ‘vote’ ka la buh ïa u dak jingkylli ba heh ïa kiba bun balang.
Kumjuh ka jingbym poi jong 8 ngut ki MDC jong ka VPP ha ka por ba jied Chief Executive Member (CEM) ka la long kaei-kaei kaba pynkyndit ïa kiwei pat ki MDC.
Ha katei ka jingthep ‘vote’ jong ka shuki Chairman, u MDC jong ka Congress na Saphai-Sahsniang, u Ma Rikut Parien u la ïoh hynriew ‘vote’ bad ka la don ruh ka jingthep ‘vote’ ïa u ‘NOTA’ katba ha ka ‘Ballot Paper’ ym shym la don ka lad ban jied ‘NOTA’ bad ki 3 ngut ki MDC ki la shuh thoh hi dalade da u khulom ‘NOTA’.
Katei ka jingïoh tam u Dr. Sankey ïa 2 tylli ki ‘vote’ ka kdew lehse ba ar ngut ki MDC jong ka VPP ne ka Congress ki la ‘vote’ ïa u MDC-NPP ne uwei ne kawei MDC-VPP ne Congress ki la vote ïa u MDC-NPP.
Haba ïakren bad u nongïalam jong ka VPP ha JHADC, u Ma Andrew Shullai uba long u MDC jong ka Jowai-North, u la pynpaw ïa ka jinglyngngoh halor ka jingïoh tam ar ‘vote’ da u MDC jong ka NPP bad u la pynshai ruh ba kam shym la don kano-kano ka jingpynbeit ryntih ha ka seng ba ïano ki dei ban jied ha ka ilekshon Chairman bad u la kynnoh ruh da kaba ong lehse lah ban dei ba ki MDC jong ka Congress kiba jied ïa u MDC jong ka NPP.
U Ma Andrew u la ong ba ka VPP ka la rai ban shong ha ka liang pyrshah bad kumta kim sngew don jingmut ban ïashim bynta ha ka ilekshon Chief Executive Member (CEM) namar kim kwah jied ïa u Bah Madonbai ne ïa u Bah Thombor.
