Shillong, Rymphang 28
U Bah Shemborlang Rynjah uba dang shah jied thymmai kum u Chief Executive Member (CEM) ka Khasi Hills Autonomous District Council (KHADC) u la ong ba u nongmihkhmat um don kyrdan hynrei u hap ban kit ïa ka lyngkor kaba khia jong ka jaidbynriew.
Haba ai jingkren ynda u la dep shah jied kum u CEM khlem nongïakhun pyrshah ha ïingdorbar, u Bah Shemborlang u la kular ban ym leh shiliang khmat bad u kloi ban sngap ïa ka jingai jingmut.
Ïa ka jingjied ïa u CEM la pynïaid da u shongknor ba dang shu shah jied u Bah Strongpillar Kharjana.
Ha ka por mynstep, u MDC ka Voice of the People Party (VPP) na Mawkhar-Pynthorumkhrah konstitwensi Bah Strongpillar Kharjana u la shimti ïa ka shuki kum u shongknor ka Dorbar jong ka Khasi Hills Autonomous District Council khlem da don kiba ïakhun pyrshah.
Ïa kane ka jingpynïaid ban jied ïa u shongknor ne u chairman, la wan pynïaid da ka Deputy Commissioner East Khasi Hills District Kong RM Kurbah kaba la sdang thik ha ka por 11:00 baje mynstep jong ka 28 tarik Rymphang 2025.
Ha shwa ba u Bah Strongpillar un shimti ïa ka shuki la wan pynkup jaiñ ryndia da ka MDC Mylliem konstitwensi Kong Aibandaplin F lyngdoh bad Bah Titosstarwell Chyne.
Ynda u Bah Strongpillar u la shimti ïa ka shuki Shongknor, ka Kong RM Kurbah ka la leit noh bad la pynïaid ïa ka dorbar da u Bah Strongpillar.
