Shillong, Lber 04
U MLA ka Voice of the People Party (VPP) na North Shillong, Bah Adelbert Nongrum, u la ong kaei ka jingïakren kaba rieh hapdeng ka Sorkar India bad Sorkar Jylla haduh ba ka Sorkar India kan mang pisa haduh 200 klur tyngka ban pynïaid shakhmat ïa ka lynti rel ha Ri-Bhoi District.
Ïa kine ki kyntien u Bah Adelbert u la bynrap haba u la buh jingkylli kumno la pyntreikam ïa ka 200 klur tyngka ba la ïohpdiang da ki bor pynïaid district ka Ri-Bhoi ban shna lynti rel.
Haba bynrap ïa ka jubab, u Myntri Rangbah ka jylla, Conrad K Sangma, u la ong ba kam don kano-kano ka jingïakren ba rieh hapdeng ka Sorkar India bad ka Sorkar Jylla hynrei kane ka pisa, ka jingthmu ka long beit thik tang na ka bynta ban siew ïa ka bai lutksan lada shim jaka.
U la ïathuh namar bym pat lah ban pyntreikam ïa kane ka pisa, kumta ka North Eastern Frontier Railway ka la phah shithi sha ka Sorkar Jylla ha ka 17 tarik Nohprah 2024 ban pynphai noh ïa kane ka pisa.
Haba sdang ïa ka jingjubab, u Symbud Myntri Rangbah ka jylla, Bah Sniawbhalang Dhar uba bat ïa ka tnat ka kit ka bah (Transports) u la ïathuh haduh mynta ym shym la lah ban pyntreikam ïa ka pisa ba la phah da ka Sorkar India na bynta ban shna lynti rel ha Ri-Bhoi district.
U Bah Sniawbhalang u la jubab ba ïa kane ka pisa la mang ha ka 30 tarik Lber 2017 hynrei ym shym la lah ban pynïaid shakhmat ba jur ka jingpyrshah ki paidbah bad ruh ba khlem ïoh jingbit na ka Khasi Hills Autonomous District Council.
U la ïathuh ba ka jingthmu jong kane ka pisa ka long ban siew bai lutksan ban shim jaka na ki paidbah bad hadien ba la ïoh jaka yn sa pynkhreh sa ka detail project report.
Ha kawei pat ka jingkylli, u Symbud Myntri Rangbah ka jylla Bah Prestone Tynsong uba bat ïa ka tnat PWD (Roads) u la pyntip ba ka Sorkar ka buh thong ban pyndep mynta u snem ïa ka surok VIP sha Umroi Airport kaba jngai haduh 23 kilometer khnang ba ki kali heh kiba kit ïa ki mar-mata kin poi sha Shillong.
U Bah Prestone u la ïathuh ïa kane ha ki kynta kylli jingkylli ha ïingdorbar kaba la ïaid lai sngi ka dorbar mang tyngka ba la buh jingkylli da u Bah Lahkmen Rymbui, MLA ka UDP na Amlarem Konstitwensi halor ka jingpyrkhing ïa ki kali heh ban ïaid na jingkieng Umïam.
U Bah Lahkmen u la buh jingkylli, la ka don ne em ka jingkiew dor haba ki kali kiba kit ïa ki mar ki mata kim ïoh ïaid shuh na jingkieng Umïam, u Bah Prestone u la ong ba ka Sorkar ka la shna ïa ka surok na Mawdiangdiang sha Shillong bypass ban ïaid ki kali heh.
Haba bynrap ïa ka jingkylli, u MLA ka Nongthymmai Bah Charles Pyngrope u la ong ha ka jingpynkhreh ïa ka Detailed Project Report, ka Sorkar ka pynïaid naei ki jaka ïa ka surok four Lane na Umïam sha Shillong, u Bah Prestone u la ong ba ka Sorkar ka dang pynkhreh ban shna ka surok four lane ka ban sdang najan ICAR sha MeECL, kan poi sha ki jaka ba don ki karkhana bad ka leit biang sha jingkieng Umïam, ka kiew shajan marten ban poi shajan jingkieng Umshyrpi.
