Shillong, Lber 04
Kum shi bynta ban shna ne pynbit pynbiang ïa ki waïar bording ilektrik ha ki jaka ba kynjang, ka Meghalaya Power Distribution Corporation Limited (MePDCL) ka la thied 6 tylli ki kali kiba la pynwandur bad pyndait da ka jingkieng ha ka dor T. 1.48 klur. Ïa kine ki kali la pyllait paidbah da u Myntri Rangbah ka Jylla, Conrad K Sangma ha ka jingïadon lang u Myntri ka tnat Bording u A.T Mondal, Chairman cum Managing ka MePDCL u Sanjay Goyal, ki nongtrei jong kane ka tnad bad kiwei kiwei.
Ha ka jingpyllait ïa kine ki kali na ka liang u Myntri Rangbah u la ong ba haduh mynta ka MePDCL ka pyndonkam da ki kali ki bym don ei-ei bad ki jingkieng na ka bynta ban pyndait ïa ki waiar elektrik.
“Kane kan dei ka sien kaba nyngkong eh ba ka jylla kan don noh ïa ki kali kiba kyrpang ïa kiba la wanrah da ka MePDCL hapoh ka Meghalaya Power Distribution Sector Improvement Project ïa kaba la bei tyngka da ka Externally Aided Project (EAP) jong ka Asian Development Bank,” u la ong.
Kitei ki kali kin ïarap shibun ha kaban pynkloi ïa ki kam ki jam ban ai jingshakri bad ban pynduna ïa ka por jong ka jingbym don ïa ka bording elektrik.
U Conrad u la ong ruh ba ka jingpynlut baroh ha katei ka project jong ka ADB ka long T.1225.74 klur kaba kynthup kham bun ka jingtei ïa ki 24 tylli ki Sub Station kiba thymmai, ka jingsdang pynbha ïa ki 45 tylli ki Sub Station kiba la don lypa, u 617 Ct Km jong u sainar elektrik na ka bynta ka 33 KV, ka jingpynbha ïa ka 295 Ct Km u sainar elektrik jong ka 33 KV uba la don lypa, u 531 Ct Km u sainar elektrik jong ka 11 KV kaba thymmai, ka jingshna pynbha ïa u 188 Ct Km u sainar elektrik jongka 11 KV kaba la don lypa, ka jingpyndait ïa ki 1.80 lak tylli ki Smart Meter. Ka jingpyntrei ïa kane ka kam baroh ka la kot sha ka 62%.
“Ka MePDCL ka dei kaba shim halade marwei ïa ka jingkitkhlieh ban pynbiang ïa ka bording kaba biang sha ki paidbah kiba pyndonkam ha ka jylla Meghalaya. Ki don kumba 7,00,000 ki nongpyndonkam ïa ka bording kynthup ïa ki karkhana kiba shaniah ha ka MePDCL ba kan ai ïa ka bording kaba baroh 24 kynta,” u la ong.
U Conrad u la ong ruh ban pynbiang ïa ka bording khlem kano-kano ka jingthut ha ka por mynsngi bad mynmiet ka dei ka kam kaba khraw ïa ka MePDCL khamtam eh ha ka por ba duna um. U la ong ruh ba ka jingsam ïa ka bording ha ki jaka kiba ïar jong ka jylla bunsien ki la mad ïa ki jingeh ha ka aïom lyiur, Kumta ban leh ïa ki kam maramot bad pynbha ïa ki sainar elektrik ha ka por kaba lyngkot bha ka long kaba eh shibun.
