Shillong, Lber 05
U Myntri Rangbah ka Jylla, Conrad K. Sangma ha ka Sngi Balang u la ong ba un sa khot ïa ka jingïalang bad ki seng saiñ pyrthei bapher-bapher ban ïakren halor ka mat ba ïadei bad ka lynti rel kumjuh ka jingwan rung kyrthep jong kiba nabar shapoh ka Jylla.
U Sangma u la ong ïa kane haba jubab ïa ka jingïatai ba lyngkot kaba la wanrah da u MLA ka Voice of the People Party (VPP) na Mawlai, Bah Brightstarwell Marbaniang halor ka jingkren ba la pynmih da u Myntri ka Sorkar Jylla, Bah Kyrmen Shylla, ba ki paidbah na Ri-lum Jaiñtia kin rai halor ka lynti rel bad ba kiba nabar kim dei ban tuklar.
U la kdew ïa ka jingai jingmut jong u nongïalam ka liang pyrshah, Dr. Mukul Sangma ban khot ïa baroh ki seng saiñ pyrthei bad kiwei-kiwei kiba don ka jingsngewkhia ban ïakren halor kane ka mat.
U Myntri Rangbah u la ong ruh ba ka jingïakren ka dei ban long katkum ki mat.
“Hato, dei ka lynti rel kaba ngi pyrshah namar lada ngi ong kumta, te ka dei ka nongrim kaba ngi shim. Hynrei ka mat kam dei ka rel, ka mat ka dei ka jingwan rung kyrthep jong ki briew kiba nabar,” u la bynrap.
Katkum ka jingsngew jong u, lada wanrah lang ïa ki briew ban ïakren, lah ban ïaid shakhmat ha ka jingïakren sngewthuh halor ki kyrdan bad ban ïakren halor ki mat, kumjuh ban wad ka lad la ka long ne em kaba lah ban pynbeit ïa baroh ki mat da kaba shim ïa ka nongrim kaba pher haba ïanujor bad kaba hashuwa.
U la ong ruh ba ka Sorkar Pdeng ka kwah ban wanrah lynti rel sha jan baroh ki nongbah jong ki Jylla ha ka ri bad kane ka Jylla lehse kan dei tang ma ka, ka ban sah khlem ka lynti rel.
“Lehse lada ngi duh ïa kane ka lad, ngam tip lano pat kane ka kabu kan wan biang,” la ong u Myntri Rangbah.
U Sangma u la ong ba 20-30 snem hadien haba phai biang, la hato la dei ban pyrkhat ha kawei pat ka rukom.
Da kaba kyntu ïa ki paidbah ban sngewthuh ïa ka jingeh jong ka jinglong-jingman mynta, u la kylli la hato lah ban wad ïa ka lad khnang ban pynbiang ïa baroh ki jingdonkam bad ban weng ïa baroh ki jingeh, ha kajuh ka por ban ym duh noh ïa kane ka jingkiew ha ka ïoh ka kot kaba kongsan ka ban long ka jingkylla kaba donkam na ka bynta ka khaïi-pateng, ki nongseng kam seng jam bad ki nongrep jong ka Jylla.
Shuh shuh u Myntri Rangbah u la kyrpad sha baroh ki dkhot ka ïingdorbar ban kiar halor ki mat shimet bad ban ïaid shakhmat ha ka rukom kaba tei bad ban pyntikna ba ïa ki mat yn ïatai ha ka rukom kaba pynneh ïa ka burom bad ka akor.
