Tura, Lber 09
Kawei na ki skul ba la rim bad ba paw bha ka sor Tura, ka St. Xavier’s Higher Secondary School ka la rakhe ïa ka ‘Platinum Jubilee’ ha ka janmiet Sngi Saitjaiñ da ka jingrakhe kaba shongkun ha phyllaw jong ka skul ha Chandmary.
Ïa kane ka skul la pynïaid da ki Missionaries of Christ Jesus ïa kaba la seng ha u snem 1944 ha Spain da ka Mother Maria Camino, ha ryngkat bad ar ngut kiwei pat ki longkmie kiba la aiti lut ïalade, kata ka Concha Arraiza bad ka Maria Theresa Unzu. Ka kamram jong ki ka long ban wanrah jingkylla ha ka pyrthei.
U MP ka Tura, Saleng A. Sangma u la don lang kum u Kongsan ha ryngkat ka jingdon lang u Deputy Commissioner, u Jagdish Chelani, Executive Chairman ka MBOSE-Tura, u C.P. Marak, u Right Reverend Bishop ka Tura, u Bishop Andrew R. Marak, u Auxiliary Bishop ka Tura, u Bishop C.J. Jose bad kiwei-kiwei ba kynthup ïa ki ‘riew pawkhmat, ki khynnah skul barim, kmie ki kpa bad ki khynnah pule.
Haba kren ha kane ka jingïalang, u Saleng u la ai jingïaroh ïa ka jingtrei shitom jong ki Sister Mishonari ha ka ban seng ïa ka skul, ym tang na ka bynta ki paidbah ka Tura, hynrei na ka bynta ka Ri-lum Garo baroh kawei bad shabar jong ka da kaba ïakynduh ruh ïa ki jingeh kiba bun rukom ha katei ka por.
Haba pynpaw ïa ka jingsngewnguh na bynta ki jingkyrkhu uba najrong, u la ai khublei ruh ïa ka jingaiti lut bad ka jingshakri khlem da pyrkhat ïalade ba la aiti da ki Sister Mishonari ba kynthup ïa ki nonghikai kiba la pynkylla ïa ka jingim jong kiba bun bad na bynta ban btin lynti ïa ki khynnah skul sha kiba bun ki jingjop da kaba bynrap ba ka nongrim ba la ïalam da ka nongseng, ka Sister Maria Camino ka la ieh noh shadien ïa ka jingpruid dak ha ka khana jong ka pule-puthi jong ka thaiñ.
Haba kdew ba ki nonghikai ki dei ki nongpynwandur ïa ki jingmut-jingpyrkhat jong ki samla, u la ong ba ka jingaiti lut jong ki ka la ai mynsiem ïa ki da ki jinglong kiba neh ha ka jingim bad ki khynnah pule barim kum ka pateng ba im jong ka skul kaba ka jingjop jong ki ka pynpaw ïa ka jingkhlaiñ ka pule-puthi ba la ai ha ka skul.
Haba pynkynmaw ïa baroh halor ka ‘Motto’ jong ka skul, “Love in Service”, u la ong ba uwei-pa-uwei u briew u don ka jingthmu bad kumta u dei ban im katkum ki jingkhmih lynti bad bteng ban noh synñiang sha ka imlang-sahlang ha ki rukom kiba don jingmut.
Ha kane ka jingïalang, la ïoh ruh ïa ka jingkren na ka General Directress ka Missionaries of Christ Jesus, ka Sr. Bangizila Kitumua, u Right Reverend Bishop ka Tura, u Bishop Andrew R. Marak, na ka Alumni Executive Chairman, Meghalaya Board of School Education (MBOSE), Tura, C.P. Marak, IAS ba la shongthait, Renilla D. Marak, Shella N. Marak bad ka Principal ka St. Xavier’s School, Tura, Sister Maria D ‘Silva kaba la wanrah ïa ka ‘Flashback of 75 Years’ lyngba ki lad ka juk stad teknoliji ba mynta.
Hashuwa, u Kongsan ha ryngkat kiwei pat ki ‘riew pawkhmat ki la plie ïa ka Higher Secondary Block bad la ïoh ruh ïa ka jingkyrkhu na u Bishop ka Tura, Reverend Andrew R. Marak ha ryngkat ka jingdonlang u Auxiliary Bishop, u Bishop C.J. Jose, ka General Directress MCJ Sister Bangizila Kitumua bad kiwei-kiwei.
