Nongpoh, Lber 11
Sa uwei de u nongñiah arshaka u la khlad noh hashen hadien ka jingshah ïuh ha ki shaka khmat jong ka trok kaba dang kiew sha nongbah Shillong hakhmat jong ka khyrdop khrong khajna (Toll Gate) jong ka National Highway Authority of India (NHAI) kaba don ha Pahammawlein 20 Mer.
Katkum ka khubor ba la ïoh lum, kane ka jingjia ka la jia ha ka por kumba 12:30 mynsngi katba baroh ar, kata katei ka arshaka kaba don ïa u registration number AS04-Y-0825 lem bad katei ka trok kaba don ïa u registration number AS01-SC-5581 ki dei kiba dang thmu ban kiew sha nongbah Shillong.
La ïathuh ba ynda shwa ban poi katei ka khyrdop khrong khajna ka NHAI, katei ka arshaka ka la thmu ban jam shakhmat bad thmu ban rung lyngba ka liang ba ju rung ki heh ki haiñ (VIP Lane) bad dei ha kane ka por ba katei ka trok ka la kum tynrah ïa kane ka arshaka bad ïuh ïa u nongñiah haduh ba un da khlad shisyndon hashen.
Tang mar ïa ïoh jingtip halor kane ka jingjia, ki pulit ka thanat Byrnihat ki la hiar mar-mar ban shimti ïa katei ka met bad pynkit sha Nongpoh Civil Hospital na ka bynta ban leh ïa ka post mortem katba ïa ka trok pat la rah noh sha thanat Byrnihat na ka bynta ban pynlong ïa ka jingtohkit.
Ha kawei pat ka jingjia, kaba la jia ha ka surok Umroi Bypass kaba dang hap ha ka shnong Umdohbyrthih, kawei ka taksi kamai kaba don ïa u registration number ML06-8101 kaba la pynher sted bad ïaid na ka liang bym dei (wrong side) ka la leit ban tynrah ïa ka trok kaba don ïa u registration number ML04-D-0386 kaba dang wan na ka liang pyrshah.
Ha kane ka jingjia, katei ka taksi kala julor phom na ki bynta ba shakhmat kat haduh ba u nongñiah jong ka, ïa uba la tip kyrteng kum u Bah Twalson Kharbudnah na ka shnong Umsmu Umsaitsning u la khlad syndon hajuh.
