Nongpoh, Lber 12
Ka United Hynñiewtrep Movement (UHM) Nongpoh Circle lyngba u samla Ricky Tongsang, Publicity & Information Secretary, ka pynpaw ïa ka jingpynrem jur ïa ka jingkren laplah jong u Bah Kyrmen Shylla, Myntri ka Sorkar Jylla halor ka jingthmu ka jong u bad ka Sorkar Jylla ban wanrah ïa ka lynti rel ha rilum Jaiñtia da kaba ong ba kiba nabar kim don hok ban tuklar ïa ka jingkwah ki paidbah jong ka thaiñ.
“Kawei ngi na ka liang ka seng ngi kwah ban pynshai sha une u Myntri ba kano-kano ka mat ba ïatyngkhuh bad ka jaidbynriew, ngin nym ailad da leilei ba kan urlong bad ngi tip shai ba ka jingthmu jong une u Myntri bad ka Sorkar Jylla ban shu khot ne wer beit tang kito ki briew ba u la buh ma u kiba lah shah thied kan long beit kum kito ki ‘public hearing’ jong ki karkhana dewbilat ha East Jaiñtia ba tang ki briew ba la shah thied kiba ïoh ban pyni ne don bynta,” la ong u samla Ricky Tongsang.
Na ka liang ka UHM Nongpoh Circle bad kumjuh ruh na them Ri Bhoi hi baroh kawei ka kyrshan tyngeh ïa ka UHM East Jaiñtia Hills District kumba ka la pyrshah ïa kane ka jingthmu jong utei u Myntri, bad ka kwah ruh ban pynshai paidbah ba ka jingwan ka rel kan nym pynsuk ïa u paidbah halor ki marbam mardih, hynrei kan pyn jyllei pynban ïa ki poi ei. Kumta ka seng hi ka ïeng skhem ha kawei ka nongrim bad kata ka long ban ai shwa ka jingïada ïa ki paid ka bri u hynñiewtrep kum ka Inner line Permit (ILP) nangta sa ïa pyrkhat ïa ka rel, pynkut ka kyrwoh.
