Shillong, Lber 13
U MLA ka Liang Pyrshah jong ka Voice of the People Party (VPP), Bah Ardent Miller Basaïawmoit ha ka sngi Palei u la wanrah ïa ka amendment ban dawa na ka Sorkar ba ka dei ban weng noh mardor ïa ka section 39 ha ka jingpynkylla ïa ka aiñ Meghalaya State Investment and Promotion Facilitation (MSIPF).
Haba shim bynta ha ka jingïatai halor ka jingpynkylla ïa katei ka aiñ ba la wanrah da u Myntri Rangbah hapoh ka ïingdorbar, u Bah Ardent u la ong ba ka seng kam pyrshah ïa ka jingwan ki nongbei pisa ban thaw kam lane ïa ka jingthmu jong ka Sorkar ban kyntiew ïa ka Jylla, hynrei ka kwah ba ka khyndew ka dei ban neh bad ki paidbah.
“Kumno phin pynthikna ba ki jaka ba la pynlang da ka Sorkar kin neh beit bad ki paidbah trai shnong ka Jylla?”, u la buh jingkylli.
Haba tyrwa ka jingpynkylla ha ka aiñ MSIPF, u MLA ka VPP u la ong, “Haba peit ha ka aiñ ba la dep wanrah, ha ka section 39 ka don ka jingmaham ba ka Sorkar ka la buh lang ha ka aiñ, ba ym lah ban ujor pyrshah ïa u Chairman bad ki dkhot ba pyntrei kiba don ïa ka jingthmu ban trei hok. Kumno ngin pyrkhat ba kita kiba pyntrei ïa ka kam kin trei hok, kam long kaba suk. Namarkata, na ka bynta ban pyllait na kano-kano ka jingma, nga kyrpad ïa u Myntri Rangbah ban sangeh noh baroh ki jingshim jaka”.
U Bah Ardent u la pynpaw ruh ïa ka jingartatien na ka jingwan ki karkhana sha kane ka Jylla, ha kaba u la kdew ïa ki jaka ba don ki ktem karkhana kum ha Byrnihat, Umïam, Lumshnong kiba la shah pynjot pynban bad kylla long ki jaka bym long shuh ban shong ban sah.
