Shillong, Lber 16
Ka jingïalang Kur Killing Timung Meghalaya-Assam ka la long ha ka sngi Saitjaiñ ha ka shnong Narlong hapoh ka Jirang C&RD Block, Ri Bhoi District.
Ïa kane ka jingïalang kur la pynlong man u snem na bynta ban ïalum lang ïa ki kur Killing Timung kumba 30 eiei ki jaid kiba dei na kajuh ka kpoh ban ithuh-ithaw, ban lait na ka shongkha-shongman shikur khamtam ha kane ka juk ki kor ki bor saïan bad tehknoloji bad internet ka lah ban ïalam bakla ha ka shongkha namar ka jingbym tip.
Shwa ban sdang ka jingïalang la pynher ïa ka lama jong ka seng Kur Killing Timung da u President ka seng kur Killing Timung Karbi Anglong u Sem Killing bad la ïoh ka jingkren pynshai halor ka jingmut jong ka lama kaba dei ka rong ‘sky blue’ kaba kdew ïa ka jingkhuid.
U kongsan u long u Longri Phangcho (IAS ophisar ba la shongthait) bad u dkhot ka North Eastern Council, u la ong ka jingïalang kur ka thymmei ban tehsong ïa ka kur ka jaid bad ban kyntiew ïa ka roi kum ka kynhun ha ka imlang sahlang hapoh ka kur bad ban ïasnoh ktilang ha ki jingeh ha ka pang ka shitom.
Kaba sngew phylla ha kane jingïalang kur Killing Timung ki la pynlong ïa ka jingduwai na bynta ki mynsiem ba la khlad ba kin ïoh ka jingjah thait. Ïa ka jingduwai la pynlong ha ki ar jaka kawei na bynta kiba long khristan bad kawei ki bym pat long khristan kata kiba dang bat dangksoh ïa niam tynrai haduh mynta.
Kiwei pat ki rangbah ba ai jingkren ki long President seng kur Killing Timung Karbi Anglong u Sem Killing, President ka seng kur Killing Timung Meghalaya u Bah Arbinus Timung, u Hemanto Killing Timung, u General Secretary ka All Meghalaya Karbi Association bad kiwei kiwei.
La pynphuh-pynphieng ïa kane jingïalang kur da ki jingrwai bad jingshad na ki khun samla ka kur Killing Amring, Rongmeshek bad kiwei kiwei. Ïa ka jingïalang la pynïaid da u Alfone Killing.
