Shillong, Lber 18
Hadien ka jingkhlad noh u khynnah 13 snem rta na ka shnong Lyndem ha Karnataka naba bam ïa ka jingbam ba long bih ha ka hostel jong ka skul kaba u pule ha katei ka jylla, na ka liang U Nongsaiñ Hima ha ka 18 tarik u Lber, 2025 u la leit ban buddien shaduh sha shnong Lyndem kaba jngai 7 kilometre na Pynursla.
Ynda la poi ha shnong, ki bahaïing jong une u khynnah kim shah ban ring dur ha ka por ba ki pyndep ïa ka jinglehniam ba khatduh ïa u. Na ka liang U Nongsaiñ Hima u la ïoh ban ïakren bad u Rangbah Shnong ka shnong Lyndem u Bah Ebren Khongthah uba la ïathuh ba u Khrehlang Khongtani u la leit ban pule sha katei ka jylla naduh u snem 2023.
U la ong ba ka jingphah pule ïa u sha Karnataka ka long ban ïoh ïa ka jinghikai ba kham biang ban nang ïa ka ktien ka thylliej la ka long ka Hindi ne ka English.
U la ïathuh ruh ba ka jingleit pule une u khynnah sha Karnataka ka dei lyngba ka jingïarap kawei ka seng kaba la tip kum ka Lei Synshar Cultural Society ha kaba ki don bun ki khynnah na katei ka shnong bad ka thaiñ kiba leit ban pule shabar da ka jingïarap kane ka seng. U la ïathuh ruh ba kane ka seng ka lah ban ai jingïarap haduh kiba leit pule degree ruh.
U Bah Ebren u la ïathuh ruh ba ym tang ba kane ka seng ka ïarap ban phah skul tang sha Karnataka hynrei ka phah ruh sha kiwei ki jylla kum ha Tamil Nadu, Maharashtra bad Andhra Pradesh.
U la ong ruh ba ki kham don bun ki khynnah na ka shnong Lyndem kiba leit pule sha Karnataka da ka jingïarap kane ka seng hynrei na kiwei ki shnong ki kham duna.
Shuh shuh u la ïathuh ba u Khrehlang u dei u khun ba 4 napdeng 10 ngut shipara bad ki don 4 ngut kiba dei shipara bad u kiba la leit ban pule sha Karnataka, bad ki don 2 ngut ki hynmen arkmie jong une u khynnah kiba la trei sha Karnataka.
U la ong ba ki don shibun ki khynnah kiba la dep pule shabar na kane ka jingïarap kane ka seng; ki don kiba ïoh kam Sorkar bad ki don ruh kiba seng kam lajong.
U Bah Ebren u la ïathuh ruh ba ha ka shnong Lyndem ka don ka skul kaba don tang haduh klas 8 bad haba ki khynnah ki la pass ïa ka klas 8 ki leit ban pule noh ha Pynursla.
Shuh shuh u la ïathuh bad la pyntip ba u Myntri Rangbah ka jylla u la kular ban ai jingïarap sha kine ki longïing ba mad ïa kane ka jingjia ba sngewsih bad hynnin ka sngi u DI u la wan poi ha katei ka shnong hadien ba la phah da u Myntri Rangbah, Conrad K Sangma.
