Shillong, Lber 20
Ka Hynñiewtrep National Youth Front (HNYF) Southern Balat Border Area ka suba jur ba ka la don ka jingbam klop ïa ka pisa kaba la poi da ki phew lak namar ki khlem thied khaw ban ai ja sngi ïa ki khynnah skul ha Dangar Dombah Border Area Upper Primary School.
Haba ïakren bad ki lad pathai khubor ha Shillong Press Club ha ka Sngi Palei, u Bah Kyllang Thongni uba dei u President u la ïathuh haba la kylli na ki nonghikai skul kim pat ju ïoh ïa u khaw ban ai ja sngi ïa ki khynnah skul.
U la ïathuh haba la wad da ka aiñ RTI (Right to Information), ka pisa la dep sei da ki phew lak tyngka namar ha ka shi snem la ju mang pisa palat lak tyngka hynrei kam shym la poi sha ki khynnah skul.
Kumta u la buh jingkylli, mano ba sei ïa kane ka pisa? Bad ong na ka liang ka seng kan sa wad jingtip namar ym map lada dei kiba donkti na ophis jong ka tnat pule puthi ne na ka Managing Committee jong ka skul.
Nalor kane u la ïoh jingtip ruh lyngba ka RTI kaba la ïoh ha kaba ïadei bad ka rukom thung kam hikai ïa u bym dei Khasi ban hikai ïa ka sobjek Hindi ïa kaba ka seng ka sah lyngngoh namar la thep kam ïa u khlem ki kot ki sla kiba biang naduh u snem 1989 bad ka seng ka la kynnoh ba um ai jingmyntoi ha skul namar um nang wat tang ban kren ïa ka English.
U Bah Kyllang Thongni u la ong ba lada ka tnat pule puthi kam pynbeit ïa kane ka kam, ka seng kam banse ban leit tied jingkhang ha ïingbishar ban lap ïa ka jingshisha.
Shuh shuh, u la pyntip ba ki don bun ki nonghikai skul ha ki thaiñ khappud kim ju leit hikai skul dalade hynrei ki shu ai bylla ha kiwei ki bym pat ïoh jinghikai, kaba la ktah ïa ka pule puthi ha kane ka thaiñ.
