Shillong, Lber 21
U Chief Executive Member (CEM) ka Khasi Hills Autonomous District Council (KHADC), Bah Shemborlang Rynjah ha ka Sngi Thohdieng jong ka 21 tarik u bnai Lber, 2025, u la pyllait paidbah ïa ka kot kaba la tip kyrteng kum ‘Ka Tynrai u Khasi bad ka Synshar Khadar’ ïa kaba la thoh da u Dr. D.L Nongspung.
Ha ka jingïakren bad u nongthoh jong kane ka kot, Dr. DL Nongspung, u la ïathuh ba ha ki 10 snem mynshuwa u don ïa kata ka mynsiem kaba pynktik ïa ka jingmut-jingpyrkhat jong u ba un thoh ïa ka kot bad ka phang kaba wan ha u lyngba ka maïan jong u Blei ka dei ka ‘Tynrai u Khasi bad ka Synshar Khadar’.
U la ïathuh ba na ka liang jong u, u la duh thiah-duh dem ruh ban pyrkhat ïa kane ka phang hynrei ka dei ha u snem 2015 ba u la sdang ban thoh ïa kane ka kot.
U la ïathuh ruh ba ka jingthoh jong u ïa kane ka kot kam dei ba u la shu thoh tang na miej hynrei u la leit ban wat bniah ruh ïa ki jingtip bin-pa-bin.
Ha kane ka kot yn lap ïa ka khana halor ka longbriew-manbriew, ki kur-ki jait, ka khyndew-ka shyiap, bad kiwei-kiwei.
“Nga la ïatai bad ïathir ïa kane khnang ba ki longdien-mandien kin ïoh jingtip. Ha kane ka kot, nga la batai shaphang ka jingstad u Khasi jong ngi kaba la tip kum kata ka ‘bio-dynamic agriculture’ jong u Khasi kaba dei ka por thung, ka por bet bad ka por ba met shapoh bad shalor, ban ïatai ïa ka bor mariang bad kumta ter-ter”, ong u Dr. Nongspung.
Shuh-shuh, u la ïathuh ba ha kane ka kot ka batai ruh halor ka jingïoh laitluid jong ka Ri India bad kiwei ki mat khnang ba ki longdien-mandien kin tip shaphang ka histori bad u la ïathuh ba ha kane ka kot ki don 33 tylli ki lynnong ha ki bynta bapher-bapher.
