Tura, Lber 23
Ha kawei ka jingjia kaba la jia ha Ri-lum Garo, ki pulit ka West Garo Hills ki la ïoh ban pyllait im ïa uwei u nongkhaïi uba la shah rahbor ha ka
kynhun ki runar kieng atiar najan ka shnong Danangre Songma kaba hap hapoh ka jingpeit jong ka thanat Dadeng-gre hapoh ka distrik.
Ha ka jingjia kaba la jia ha shuwa jong kane ka jingpyllait im, 2 na ki 3 ngut ki runar jong kane ka kynhun rahbor ki la mynsaw – kaba la ïalam sha ka jingshah kem jong uwei bad ka jingkhlad noh jong uwei pat, katba dang leit rah ïa u sha ka ‘hospital’ kaba jan tam.
Katkum ka tyllong khubor na ki pulit, u khun jong utei u nong-khaïi, u Rasik Hussain u la ujor ejahar ha ka 20 tarik Lber ha thanat Damal Asim ha kaba u la kdew ba u kpa jong u, u Ruvi Hussain u la shah rahbor ha ki briew ki bym lah ban ithuh satia – kiba rah ïa ki tiar siat bad ki kukri katba ki dang pynkit masi najan ka thaiñ Danangre Songma.
Hadien kane, ki SF-10 ‘Commando’ ha ryngkat ki kynhun pulit jong ka Dadenggre bad Damal Asim ki la pynlong ïa ka jingwad khnang ban ïoh pyllait im ïa utei uba shah rahbor. Ka kynhun ka la seisoh bad lap ïa ka jaka rieh jong kitei ki nongrahbor ha Dipogre Asim Chiring kaba hap hapoh ka jingpeit jong ka thanat Damal Asim ha ka por mynstep jong ka 21 tarik u Lber.
“Mar ïa poi, ki runar ki la siat sha ka kynhun pulit bad hadien kata, ngi la pynphai kylla kum ka jingïada ïalade. Ar ngut na ki nongrahbor kiba la mynsaw ha ka por jong ka jingïasiat la ïoh ban kem noh, katba ïa u Hussain la ïoh ban pyllait im. Ïa utei u lanot lem bad kito kiba mynsaw la ai jingsumar mardor ha Dadenggre PHC,” ong u heh pulit ka distrik, u Abraham T. Sangma.
Ha ka jingtalasi hadien ka jingkhynra, ki pulit ki la lap ïa ki sabut kiba donkam kynthup ïa ka suloi ‘shotgun’ ba la shna hapoh ka ri, ka pla ‘Puma’ kaba rit bad ka tari. Uwei na ki nongrahbor uba la mynsaw, u Chingsan Marak u la shah kem katba uwei pat, uba la kham mynsaw, u Raksan Marak u la khlad noh na ka jingmynsaw katba dang pynkit ïa u na Dadenggre PHC sha Tura Civil Hospital.
