Shillong, Lber 24
U Myntri ba khmih ïa ka tnat Pule Puthi ka Jylla, Rakkam A Sangma, u la ïathuh ba la bthah ïa ki ophisar bad ki nongpyntrei ïa ki skul bad kolej Sorkar ba kin pynstet ban pyndep noh ïa baroh ki jingtei kiba dang sahteng.
Ha ka Lah Sngi U Blei, u Myntri u la shong bishar kam halor ki projek tei ïing skul ba dang sahteng ha kylleng ki jaka ka Jylla bad bthah ba dei ban pyndep noh kloi.
Kine ki projek ba dang sahteng ki kynthup ïa ka jingtei jong ka Science & Commerce College ha Mawphlang, Mahendragranj, Patharkhmah, Rongjeng, ka DIET ha Williamnagar bad Polytechnic ha ki district, ba kynthup ha South Garo Hills, West Jaiñtia Hills, West Khasi Hills, East Garo Hills bad Ri-Bhoi.
Katkum ka jingïathuh u Myntri, ki don bun ki daw halor ka jingslem bad katto-katne ki dei namar ka jingslem ban pyntrei na ka liang ki kontraktor bad don ruh namar ka kam jaka-puta, ha kaba u la ong ruh ba ki jingpyrshang ki la ïaid shaid-shaid ban pynbeit noh ïa baroh kine ki jingeh ba ïakynduh.
U Rakkam u la pyntip ba na 38 tylli ki Eklavya Model Residential School (EMRS), 3 tylli ba kynthup ha Mawkynrew, Khatarshnong, Laitkor bad Rongara ki ïakynduh jingeh ha kaba ïadei bad ka jaka, bad na ka bynta kane la bthah ïa ki Deputy Commissioner bad ki Block Development Officer (BDO) ba kin ïakren bad ki trai jaka bad ban pynbeit noh kham kloi ïa ka kam. Katba 13 tylli ki EMRS ka jingpyntrei ka la sdang ban ïaid, 16 tylli la pynkhreh ban khot tender noh bad ka sngi ba khatduh la buh kan long ha ka 25 tarik Lber, bad 7 tylli ki dang don ha ka jingpynkhreh ïa ki kot ki sla.
“Ha shwa kane, ha u snem 2019-20 ïa ka kam la aiti sha kawei ka agency na Manipur, hynrei hadien ka Sorkar Jylla ka la thoh sha ka Ministry bad ka Ministry ka la ai biang ïa ka kam sha ka Sorkar Jylla ba kan pyntrei ïa ki EMRS”, u la ong.
Ha kaba ïadei bad ka jingmaramot ïa ki skul lyngba ka Rashtriya Uchchattar Shiksha Abhiyan (RUSA), u Myntri u la pyntip ba ki don 1608 tylli ki skul ha ka kylla ba nyngkong (Phase-I) ba la mang pisa. Ki don katto-katne ki district kiba la dep, hynrei ki skul kiba kynthup ha Mawsynram, Mylliem, Mawphlang, Khliehriat, Amlarem, Umsning, Patharkhmah bad Umling Block ym pat sdang ïa ka kam.
