Jowai, Lber 24
Ki bor pulit jong ka East Jaiñtia Hills District ha ka 23 tarik Lber ki la ïoh jingtip halor ka jingdon jong kawei ka metïap jong uwei u shynrang briew bym lah ban ithuh kaba thiah lyngktar harud surok bah NH-06.
U Superintendent of Police ka East Jaiñtia Hills District lyngba ka kyrwoh u la ong, ïa kane ka metïap la lap najan ka surok bah NH-06 ha Lumparis, Ladrymbai Datsimpein.
Hadien ba la pyndep ïa ki jingtohkit bniah kumjuh ka post mortem bad kiwei kiwei ki jingdonkam jong ka aiñ bad la buh ïa ka met ha jaka buh metïap jong ka Khliehriat CHC, East Jaiñtia Hills District na ka bynta ka jingpynithuh bad shimti.
Une u briew u dei uba don kumba 55-60 snem rta, u don ïa ka rynïeng kaba 5.5 phut, uba pyllun dur bad phong patlun lyngkot rong ïong.
Ki bahaïing lane kino-kino kiba ithuh ïa utei u briew, ki lah ban phone ha une u number 7005972715.
