Jowai, Lber 25
Ka tnat Forest jong ka Jylla Assam ka la pyllait noh ïa ar tylli ki kali Bolero Pick-up jong u nongshong shnong Khanduli, West Jaiñtia Hills District hadien ba la kurup ha ka 22 tarik Lber.
La kurup ïa kitei ki kali hadien ka jingujor jong ki Karbi na Tadonglangso ba ki nongshong shnong Khanduli ki ïa pom dieng na ka khlaw ba ki Karbi ki kam trai bad la rah noh ïa kitei ar tylli ki kali sha Hamren ha West Karbi Anglong District. Hynrei na ka liang jong ka Dorbar Shnong Khanduli ka la ong ba katei ka khlaw kaba ïa pom dieng thang, ka dang hap pura hapoh u pud u sam jong ka shnong Khanduli.
Kawei ka kali pick-up kaba don ïa u registration number ML04-C-3505 kaba dei trai da u Ma Hom Muruh, la pyllait ha ka 23 tarik Lber katba ïa kawei pat ka kali pick-up kaba don ïa u registration number ML05-H-6747 la pyllait pat ha ka 24 tarik Lber.
Ïa kine ar tylli ki kali la pyllait hadien ka jingtuklar jong ki bor pynïaid district jong ka West Jaiñtia Hills District hapoh ka jingïalam u Executive Magistrate Ma GH Passah.
Na ka liang ka Dorbar Shnong Khanduli ka la ai khublei kyrpang ïa ka Sorkar Jylla kumjuh ïa ka bor synshar District jong ka West Jaiñtia Hills, namar lyngba ka jingshimkhia jong ki ba ka tnat Forest jong ka Assam ka la pyllait noh ïa kitei ar tylli ki kali Bolero Pick-up.
“Ngi ai khublei kyrpang ïa u Symbud Myntri Rangbah ka Jylla Ma Sniawbhalang Dhar uba long u MLA ka thaiñ, u Deputy Commissioner jong ka West Jaiñtia Hills AK Singh, u Superintendent of Police Ma Chemphang Syrti bad kyrpang eh ïa u Executive Magistrate Ma GH Passah bad Officer In-charge Saitsama Bah K Ranee kiba da ka jingtrei shitom ka jong ki, ba ka tnat Forest Assam ka la pyllait noh ïa ki ar tylli ki kali”, la ong u waheh shnong Ma Yooshida Nongspung.
