Poi ka bai thang bording shi lak bad da ki phew hajar tyngka

Nongstoiñ, Lber 25

Ha ka Sngi Ba-ar jong ka taïew, ki paidbah nongshong shnong ka thaiñ Nongstoiñ, ki la kyndit thret hadien ba ki la ïohpdiang ïa ka shithi na ka ophis jong ka MePDCL Nongstoiñ ba kin hap ban wan siew ïa ka bai thang bording kaba la poi da ki phew hajar bad don ruh kaba poi haduh shi lak tam ha kaba kane ka la pynbitar ïa u paidbah.

Ki paidbah kiba ïohpdiang ïa ki shithi na katei ka tnat, ki la leit ban tur puk sha katei ka ophis kaba don ha Nongstoiñ da ka jingthmu ban leit pan jingshai halor katei ka jingpoi shithi, kaba kdew ruh ban aiti sha ka aiñ lada kim shimkhia ban wan siew.

Ha katei ka sngi ïa ki paidbah la synran ruh da ka HNYM West Khasi Hills District hapoh ka jingïalam u President Bah Tailan Lyngkhoi.

Ki nongïalam ka HNYM haba kren sha ki lad pathai khubor ki la ong ba hadien ba ki la ïoh ïa ka jingujor na ki phew ngut ki nongshong shnong hapoh ka West Khasi Hills District ha kaba ïadei bad ka tnat MePDCL hapoh Nongstoiñ, hadien ba ka Sorkar ka la pynmih na ka bynta ka OTS Skhim ba ka Sorkar kan map noh ïa ki sut jong baroh kiba don ram kiba dang sah ka bill light hapoh ka West Khasi Hills.

Na ka liang ki nongïalam ka HNYM ki la ong ruh ba ka seng ka pynpaw ïa ka jinglyngngoh ka long ba ki paidbah ki kulmar ba na ka liang jong ka tnat MePDCL kam don kano-kano ka jingpynshai ba naduh mynno kin ot ïa ka bording bad haduh katno ki don kata ka sut. Hynrei mynta ka jingwan ka shithi sha baroh ki nongshong shnong kiba sah ïa ka bai thang bording ka long ba kam duna ïa ka phew hajar bad ïa ka lak kumta ter ter bad ym shym la don kano-kano ka jingpynshai da kaba shu thoh beit tang da ka bill hynrei ym shym la pynshai bha naduh u snem aiu ki sah bill bad haduh u snem aiu kim pat siew ïa ka bill light bad ym don ruh ka jingpynshai ha kaba ïadei bad ka sut naduh ba sdang haduh ba kut.

Shuh shuh ki la ong ruh ba hadien ka jingud jingnam, bad hadien ba ka seng ka la leit ban ïakynduh ïa u SDO, u la kubur ba um don bor eiei namar ka dei na ki bor bahalor.

Ki la ong ruh ba kaba lyngngoh shuh shuh ka long ba ki don ki paidbah kiba ju siew ruh man u bnai ïa ka bill light hynrei ki dang poi ïa kine ki shithi ba ka sah ka ram ka jong ki da ki phew phew hajar bad kam don ruh kata ka jingpynshai, bad ki don ruh ki longïing ba kim pat shim bording hynrei ka shithi sha ki ruh ka poi.

Halor kane ka bynta, ka HNYM ka buh ïa ka jingkylli ba hato ka tnat ba dei peit ka treikam ha kano ka dur bad ha ka jingshisha ka jingdon jong ka tnat hapoh Nongstoiñ ka long ban pynsuk ïa ki paidbah ym ban phah klumar ïa ki shithi sha ki paidbah.

Kumta, ka HNYM ka dawa bad kyntu ïa ka tnat ba dei peit bad ïa ka Sorkar Jylla ba ki dei ban khmih bniah sa shisien pat ïa katei ka bynta.